ফুরগৗল ভারত দিশম 

Independence Day (india)// Santali Independence Day //Santali 15 August 

                                

ফুরগৗল ভারত দিশম

 ফুরগৗল । ‌ ফুরগৗল । আবদ ফুরগৗল । সের্স্মা রেনাঃ ১৫ ই আগস্ট দিনরে ঞেল এনাঃ ফুরগৗল ভারত রেনাঃ চির অটাং কেদাক । তিরে সাব কাতে তারেন রে গঃ কাতে ‌। দৗড় গাড়িরে তলকাতে । অড়াঃ রে খুন্টি বিদ কাতে । হয়তে হিপিড় হিপিড় ওটাং এনাঃ ফুরগৗল ভারত রেনাঃ চির । গটাঃ সেৎ ফুরগৗল আড়াং তাকের রাকাব এনাঃ ।

ফুরগৗল । ফুরগৗল । আব দ ফুরগৗল । আবনাঃ জানাম দিশম দ ফুরগৗল । আবনাঃ ভারত দ ফুরগৗল।

তবে কাথাদ চেৎ ? 

সারিগেকি আয়মা ভারত আয়ো রেন হপন গারজাও কাতেক লেই দাড়েয়াদা –আবনাঃ জানাম দিশম ফুরগৗল। আবদ ফুরগৗল । বাং ! বাং ! বাংকলে দাড়েকাওদা ।

অনাতেগে রাকাব এনাঃ ফুরগৗল মাহারে হেঁদে চির । হেঁদে চির সাব কাতে মিছিল । মিছিলরে গারজাও আড়াং । আড়াংতে সেঁগেল তারাস । নওয়া তারাসতে খকজ কানাক ফুরগৗল দিশম ।

অনেঃ খালিস্থান উত্তর খণ্ড ঝাড়খন্ড আরহঁ হোয় দাড়েয়াঃআ এমান খন্ড । আর মিৎ মেৎ দ ঞেল এনাঃ । ভারত রেনাঃ যাঁহাক মেতাঃ কান জাতীয় পতাকা । সাব কাতে । স্কুল । কলেজরে । হররে বিভিন্ন রাজ – আরিয়ৗ নেতাক । বিভিন্ন বীর বায়ার কওয়াঃ মুঠৗনরে বাহা-সালা আরাও কাতে ওডোং এনাক মিছিল আর মিছিল। শহর বাজার কাঁপাও কেদাক্ ভাগে ভাগে সেরেঞ রাহাতে ? যাঁহাক মেতাঃ কান জাতীয় সঙ্গীত । রৗস্কৗতে আন্দোড় কেদাঃ ক শহর বাজার ।

কাথা দ নওয়া কানা কুকদি কানা । নওয়া চেদাঃ ?  চেদাঃ বায় তিয়ু দাড়েয়াদা ঝতম হড়াঃ অন্তর নওয়া ফুরগৗল সেরেঞ । 

তবে ফুরগৗল দ চেৎ ? চেৎ রেনাঃ দ ফুরগৗল ? অকয় লাগিৎ দ ফুরগৗল ? অকয়লেয়কে অকালেকান ফুরগৗল লৗগিৎ দিশম হুলগৗরিয়ৗক হুল লেদাঃ । অকা লেকা ঞেল সানাঃ লেৎ কোয়া ভারত আয়ো আঃ রুপ ।

হুল । হুল । হুল । শায় । শায় হুলগৗরিয়ৗক লাঁদাকাতে দিশম লাগিৎ আরাঃ বাহা-মালা আরাও লেদাক হটঃরে । আরাও লেদাক মিৎ সারি ফুরগৗল দিশম লৗগিৎ ।

তেহেঞ হঁ বাংব দুশৗও দাড়েঃ কাদ কোয়া আবরেন বীর বায়ার । তিস হঁ বাংক তিরুব আকাদা বহঃ । নাহাচার । কচলন শাসেতরে । জয় চির লান্দাঃ কাতেক গাতেঃ কাদা । লেয় তেহঁ লাজাও অটকারঃ আ । আবোদ উনকু রেনগে আরোশ কানাঃ বন । নওয়া ফুরগৗল দিশম রেনাঃ চিতৗর ঞেল তেঁহ লাজাও আটকারঃ কানা ।

 

বার চপুদ জমাঃ অভাবতে শায় শায় মানমী ঞুতৗত রেক ঞুরহৗ আদঃ আনা । শায় শায় মানমী রহড়ততি । ধান্দরাঃ অঁজরাঃ কিচরিজ হরঃ কাতে তিগু আকানাক শহর বাজার রেনাঃ হর ধারে রে । মচারে তাকেরঃ কানা আকোয়াঃ বাঞ্চাও রেনাঃ নেহর আড়াং । তি আতাং কাতে ঞাম এদাঃক শুধু মানমীয়াঃ হিদিজ । নওয়াদ ফুরগৗল ভারত রেনাঃ রুপ ।

সিঞ তিকিন বেড়ারে । সারদি ঞুতৗত আড়গো হিজুঃ কানা । জম রেনাঃ অভাবতে টাপাও হিজুঃ কান রুয়ৗ হাসু । রোগী কোয়াঃ ধারতী বিদৗয় রেনাঃ মিৎ মারাঃ মিছিল লাহাঃ হিজুঃ কানা । মানমী মানমী জপম রেনাঃ দিন সেটের কানা । আম লাগিৎ মেনাঃ দিশমরে খালি হসপিটাল বানুঃক ডাক্তার বানুঃ রান । যদিও চাঁদো দায়াতে ঞাপাম কানা সাদা কাগজ সাকামরে অলকাতে এমাম কান রান । কিরিঞ রেনাঃ কাওডী যদি বানুঃ তাম । মা তবে কাগজ গে লেওহা কাতে জমমে ।

আমদ ফুরগৗল দিশম রেন মনোয়া । নোয়াগে ফুরগৗল ভারত দিশম । আবদ ফুরগৗল । আম কি বাডায়াম ফুরগৗল দিশম রেনাঃ হক আইধৗরিদ অকা কানা । বাড়ায় কেৎ বাম বাড়ায় কেৎ অনাদ মারাং কাথাদ বাং কানা । তবে ঞেলতে যাঁহাঞ সেঁড়ায়েদ অনাদ নওয়া কানা । লিচৗড নিধৗন মানমী যাঁহা তিনৗঃ এম রডজ সাসেত দাড়েযায়া । উনাঃ গে ধাসাও এম । রেঞ্জেজ অরেজ গিদরৗদ । বুলৗও আগু কাতে যাঁহা তিনৗঃ এম দাড়েয়াআঃ উনৗ গেম খাটাও দাড়েয়ায়া । 

নিধৗন নাচার সাংসার রেন তিরর্শা হপন সাব কাতে জম সিম দাড়েয়ায় । মানমী ছিতি বিতি কাতে যাঁহা তিনৗঃ গে দল এম তেয়ার দাড়েয়াআঃ । ভিতৗর মহল খনদ ঞাম আম সাবাস ।

জম ঞু কিরিঞ আকরিঞ চেতানরে যাঁহা তিনৗ গেম দাড়েয়াঃ উনৗগে ভেজালাঃ মে । মেনা তাম কাওডী বানুঃ তাম আইন । মানমী হেলেজ কাতে পারমঃ কাওডী রেনাঃ জোরতে । কোট কাচৗরি পেরেজ আকাদাক আমাঃ ফুরগৗল দিশম আইন বিদ । এড়েঃ কাথাক সারি,সারি কাথাক এড়েঃ যাঁহা লেকান কৗই কাতেগে চালাঃ মে । মেতামা কৗয় দবাং কান । পারমঃ গেয়াম । তবে কাওডী । কাওডী । নোয়াগে ফুরগৗল দিশম । আবদ ফুরগৗল । 

শায় শায় তিরলৗ হপন হড়ম আকরিঞ কাতে লাজাও অটাঃ কাতে জমাঃক আরজাও এদা নুকু ঠেন মল হঁ মেনাঃ আব দিশম রেনাঃ রচকার । নোয়াদ জানিজ আড়ি গরব লেকানাঃ ফুরগৗল ভারত রেনাঃ রূপ ।

নওয়া ফুরগৗল দিশমরে তিনৗ সুবিধা তিনৗ সুবিধা । বাং এম বাড়ায় রেঁহ ভোট দ চেৎ ? 

আমাঃ অধিকার প্রয়োগ দাড়েয়াঃ আম এম দাড়েয়াঃ আম ভোট বেনাও দাড়েয়াক আম মন্ত্রী উনকু কাথা তগে আচুর আ আমা বহঃ চেতান রে লাঠি তিনৗ কাটি, কাটি কাওডী লিচৗড় নিহড় ভৗলৗই লাগিৎ এম এদাক গড় । সনাতেগে রাকাব কানা সেঁড়া দালান । আর হঁ আমরেন মন্ত্রী কোয়াঃ গাড়ী । যাঁহায় লাগিৎ গড় উনি ঠেন তিয়ুঃ তেগে চাবাঃ কানা । তিনৗ রৗস্কৗ রেনাঃ কানা । আর হঁ রেডিওতে টি ভি তে আর হঁ খবর কাগজঃ সাকাম তে । তিনৗ আব লাগিৎ কাউডী ক সং এদা ।

                                  

ফুরগৗল ভারত দিশম

আরহঁ নওয়া ফুরগৗল দিশম রেনাঃ আড়ি মারাং রৗস্কৗ রেনাঃ কাথা । আবায়াঃ সংবিধান রেনাঃ আই ধৗরদ ঞেল জং পাড়াও জং গে । তিনৗ মজতে অল মেনাঃ আ । নোওয়াগে ফুরগৗল দিশম রেনাঃ চিতৗর  । আবদ ফুরগৗল ।

এনেজ দাড়েয়াঃ আম । সরেঞ দাড়েয়াঃ  আম । লান্দা দাড়েয়াঃ আম । আব জানাম দিশম দ ফুরগৗল । আবদ ফুরগৗল । 

অনাতেগে সারিকাথা লইতে আমদম তিগুন দিশম রিনিজ বাইরি । সারি মানমী মানমী লেকাতে বাঞ্চাও লাগিৎ যদিম লৗড়হৗয় । উনদয় মতাম ভেগেদিয়ৗ ললহাতাং । মেনাঃ ক শায় ।শায় আসুল সতা আব ফুরগৗল দিশমরে । বাঞাও রেনাঃ গারজাও সাঁওতে যদিম লৗড়হৗয় । উনদয় দিশৗ দাড়াং মেয়া সেঁগেল টুটিতে । নওয়া দ চেতা ফুরগৗল দিশম রে শান্তি দহয় লাগিৎ রিতি । আব দিগম দ ফুরগৗল । আবদ ফুরগৗল । 

উইহৗর দহড়াঃ মে ১৯৫১ সালরে তিন লক্ষ ২৯ হাজার বেকার ক তাঁহেকানা । 

১৯৮৪ সালরে ২কোটি ২৮ লক্ষ ৬৯ হাজার নিতঃ ১৯৮৬ রে তিনৗ । যদি বাড়ায় সানাঃ নেয়া কাটিজ অটাঃ কাতে ঞেল মে ।

নওয়া গে ফুরগৗল ভারত দিশম । আবদ ফুরগৗল।তিনৗ সৗগৗই তিনৗ সুলুক । আবোয়াঃ ফুরগৗল দিশম রে । 

মাসে কয়গমে পাঞ্জাব তেহেঞ সসান রে পরিনতঃ কানা । উত্তর খণ্ডরে মায়াম লিঁগিঃ কানা । গুজরাট রে হিঁসৗ আড়াংতে জিওয়ৗ ধাসাঃ কানা অন্ধ্ররেহঁ নওয়া রেনাং হয় রাকাব কানা । আরহঁ উইহৗর তরায়তে আসাম রেনাঃ ঘটনা । নতে ঝাড়খণ্ড দিশম লাগিৎ হঁ সেঁগেল তারাস রাকাব কানা ।

আব ফুরগৗল দিশম রে হেঁদে চির । বারুদ রেনাঃ গুলিতে মচাঃ থির । নওয়া গে আব ফুরগৗল দিশম রেমাঃ নিতী ।

মচাঃ তে গারজাও কাতে লেয়মে মারাং মারাং রাজ আরি কোয়াঃ কাথা । র্মাকস ! এঞ্জেল । লেনিল কামি ধারা । মচাতে ধাসাও কম পুঁজিপাতি জোতদার জমিদার । শাষক শোষক গোষ্টি । দিশম হড়াঃ লৗড়হৗয় বাঞ্চাল কাতে দহয় মে । তবে আম হঁম লেখাঃ মিৎ মারাং রাজনিতী বির । নওয়া ফুরগৗল ভারত দিশম রিনিজ । সাবাস সাবাস । নোয়া গে ফুরগৗল দিশম। আব জানাম দিশম দ ফুরগৗল। আবদ চেতাঃ ফুরগৗল? 

                               

ফুরগৗল ভারত দিশম

যাঁহায়াঃ দায়াতে চেতাঃ বাঞ্চাও মেনাম তেহেঞ চেতাঃ যাঁহায়ক উৎনৗও এদ মেয়া । উনকুদ অকয় কানাক বাডায়াম ? বাড়ায় রেহম বাং এম বাড়ায় রেহঁ কাটিজ বাড়ায় কাঃ মে । উনকুদ হয়ো কানাক ওয়াশিঙটন মম্কো রেন আসুল ভুলি । যাঁহা বাং ঞেলঃ কান মিৎ হাপাক আচুর এদা আমাঃ বহঃ চেতান রে । আমরেন গে লেভড়া জাল চাটাঃ সেতাঃ আসুল কাতে । অনাতেগে মচা সিকুব গেতাম । যাঁহা তিনৗগে চোকো চোকেতে চাটঃ এদা আনাগেতায় জড়োঃ উনি ঞেলেমে রহড় মুডহৗৎ লেকা রাজ আরি মাচি চেতান রে । নওয়াগে ফুরগৗল ভারত দিশম রেনাঃ রাজ আরি । আবদ ফুরগৗল । 

আরহঁ আজম তেম রৗস্কৗ কানা জানিজ আম লাগিৎ হিজুঃ কানা মোডেল স্কুল । অড়াঃ রে দুড়ুব কাতে রেডিও টি,ভি । তেগে আমাঃ মুরুখ খনেঃ বাঞ্চাও মেয়া । আব জানাম দিশমদ ফুরগৗল । আবদ ফুরগৗল ।

মনে খানেম মিৎটাং চাকরি দরকার তাম । তাহলে খান আচুর মে মিমিৎ গটাং চির লাতার রে । যাঁহায় রডজ তেয় পাকটঃ কানা ।

দালকম আমলেকানগে রেঙ্গেজ মানমী । দরকার হয়োঃ খান গজ কম । যদি বাংক সোরোঃ অনা চির লাতার রে । নোয়াগে ফুরগৗল দিশম রেনাঃ রাজ আরি । পালেন জুটৗও দাড়ে জং মিৎটাং চাকরী ।

ফুরগৗল আবনাঃ জানাম দিশম । আবঃদ ফুরগৗল।আব দিশমরে কামিয়ৗহড় তিনৗ মাসে ঞেল কম ?

অনাতেগে প্রতি ঘন্টারে মড়ে গেল হড়ক বেকারঃ কানা ।

অনলিয়ৗ:-কে.আর মুরমু