যুদিম সিবিল আকাওদিঞা 

 যুদিম সিবিল আকাওদিঞা

এভেনঃ মে বেরেৎ মে 

অক্ত সেটেরাকানা ।

কয়গ মে সাঁওতা আয়ো সেৎ 

তাহাম তুকুজ মহড়াঃ কানায় —

অকা সেৎ ।

আলম বিলমা লগনঃ মে 

হয় বান্ডো রিমিল রাকাব কানা 

যুদিম সিবিল আকাও দিঞা

জিউই আলায় মে ।

লেভড়া চাট লিটা আঃ সিরজন 

লগন দেবন বর্জন —

বঁগা খঁড় ফুড়ুঃ খনাঃ 

বাবন ঢের আসেন। 

নিশৗ তেদ জিউই নাসাঃ 

ধন ধাসাঃ —

সুলুক সৗগৗই কাশাঃ ।।

দেবন ছুটাঃ যুওয়ৗন কড়া কুড়ি 

উছৗন পাশনাও আব 

আঁগচ আকআব —

খেরওয়াল বিরৗদৗলি ।

যুদিম সিবিল আকাওদিঞা

লাহা হোয়োঃ তামা ।

হিরকৗ হেনস্হা এগের রহেৎ 

জানুম খচা উসুল খারাং 

এরেড় কাতে তাড়াম হোয়োঃ তামা 

তাড়াম লাঁগা মনে জিউই 

রুওয়ৗড় রেদ …………….

যুদিম সিবিল আকাওদিঞা

দুলৗড় ঝারনা উমুল রেদম গিতিজ জিরৗঃ ।

যুদিম সিবিল আকাওদিঞা

জিওয়ী আলায় মে ।

রিলৗমালা খেরওয়াল সাঁওতা 

বেনাও তেগে হোয়োঃ আ । 

নিশৗতে অটাং চাবাঃ কানা দিশৗ 

মেঁৎরে ঞেলঃ ঝৗপসা 

রুওয়ৗ রাবাং রে খৗলি 

ডৗন যুগিন ক কামসাঃ ।

ঞুতৗৎ সাঁওতা তাহাম তুকুজ 

তাপাকিজ তেক গুজুঃ কানা মানওয়া ।

হাঁডি পাওরা অজরা আঁধা পৗৎয়ৗও 

বহেল চালাও হচনঃ মানওয়া আঃ 

চঁহক চেতনা অৗকিল বান দাঃ তে ।

যুদিম সিবিল আকাওদিঞা

মনে রিকিড় হোয়োঃ তামা ।

রিলৗমালা সাঁওতা তালা—

উনদ রহয়ালাং কিষ্ট চূড়া বাহা পহা 

লেগেজ লেগেজ হারাঃ ।

ফৗগুন কুহুয় কোহেল রে 

আজমঃ তিনৗ সড়ম চহান চরক ।

যুদিম সিবিল আকাওদিঞা

তর সাহাও তেগে হোয়োঃ তামা 

অনা সাগুনান দিন লৗগিৎ ।

অনলিয়ৗ: ভারতী মান্ডি