টাটানগর

টাটানগর

বাংলা দিসম জাপাঃ রেগে মেনাঃ আনা বিহার 

লৗই অৗঞ নন্ডে কাথা কৗটিচ অনা রেয়াঃ সাউকার সারে সারে মেনাঃ নন্ডে রিলৗমালা সড়ক 

অৗডি চহট চাঁইট অনা নাপায় গেচ ভড়ক।

সিঞে ক্রিদৗ কৗমৗই বৗনুঃ কৗমি রেনাঃ জুহার 

হিজঃ সেনঃ কুলি কৗমি বানুঃ তাক গুজার। 

অনা বিহার তালারেগে নওয়া টাটানগার 

অন্ডে যত হড়ক রেনাঃ ঞেলঃ তাক পসার। 

ধৗরতি জাকাৎ হরেক রকম হড়ক হালি মুলি 

মেনাঃ কওয়া উনকু যত নন্ডে ঘালা ঘালি। 

নওয়া এড়ং নাগার রেনাঃ আডি মেনাঃ বাজার দকান মেনাঃ হরেক রকম দুরিব ঞেলঃ মজার। 

হর ধারেরে গটা পাড়া আটাল আটাল পাকা 

আতাং আক জাওগে নণ্ডে হাজার হাজার টাকা। দিন দিনগে বাইসৗও আকান নন্ডে দিনের হাট 

অনা এড়ং হোয়ঃ কানা গটা ঘাটে ঘাট। 

হর হরতে গটাধারে বিজলী রেনাঃ বাতী 

চাঁদো ইপিল জোলোঃ লেকা চেৎএম লৗইয়া বাড়তী বিষ্টুপুর জুগশেলাই আর বাজার মেতাঃ সাঁচি। 

অন্ডে হাজার দকান মজার লবতে মেঁৎএ আঁকচি। সনা রুপৗ গয়না ঝলকাঃ সাজাও আকাৎ ভাঙচি। মনে লালচ লাড়ায় তামায় ঘেঁট পুইসৗ বকচি। 

হরেক রকম কুড়ি কড়া হরতে জপর জোলে 

হিজুঃ সেনঃ ঞেলঃ আক উনকু পালে পালে 

পান্তে কাতে গাতে কাতে সেরেঞ দুরাঙাতে। 

গাওইচ গড়াঃ রড় লাঁদক নানা হরবঙাতে।

হড়ম রেনাঃ ধুতি শাড়ী খোলন অলন গলন 

নন্ডে বানুঃ জাতি বিচার যত গেচ চলন। 

হরঃ বাঁদে খাপান কুড়ি দাঁড়ানাক লগর 

পকেট পেরেচ লোট তাড়াক উদুগ কড়া ডিঁগর। লাডু মিঠাই পানের দোকান গটা অড়ে রড়ে চাপাদাক পুইসৗ নন্ডে জমক লেমে তোড়ে। 

নুকু রেয়াঃ আড়াং ভড়ং ঞেলঃ ছুবি ছাবি 

ঘাড়ি ঘাড়ি পানক জমা লুটি গাবা গাবি। 

অৗডি অডি হরতে মাতাল ওনকো টলং মলং 

চালাঃ আক উতুচ তুপুচ কলসায়াক তলং। 

আদম কদ চালাঃ আক হরতে গড়াগুড়ি 

আধেন দক কুচৗ কঃআ আদ গুড়িসুড়ি। 

ঝোলে ঝোলে ডুলুং গাড়ী মটর বড়ুচ বডুচ 

অনা কগে ঞেল জংতে মনে মুরচু মুডুচ্। 

হড়ক অরা রিসকা গাড়ী ঞেলঃ নাপায় ফেশন 

বাবু ভায়া অনাতেক হিজুঃ সেনঃ টেশন। 

ঘাড়ি ঘাড়ি রেলের গাড়ী হিজুঃ সেনঃ হেঁসফেঁস অদল বদল কোল্‌ক গাড়ী তড়ে তেক পরমেশ। কায়রা খিজুর লেবু ডালা দিপিল কাতে হাঁই ফাঁই হহয়াক গরম গরম বাদাম ভাজা চাই চাই। 

নঁড়ে মেনাঃ এমান তেয়াঃ অৗডি অৗডি দুরিব অৗসুলঃক রাঁড়ি ভুঁড়ি রেগেচ অরেচ গুরিব। 

নাগার রেনাঃ কাথা হোয়ঃ যত গুনা গুন্তি 

কল কব্‌জা রেনাঃ কাথা নডে দবন বিন্তি। 

মেঁড়হেৎ রেয়াঃ কারখানা বৗঞ দিসৗয় ওরতো গোঁড়েৎ 

আঁজম কাথা লৗই জংতে রড়েৎ তেঁড়েৎ গড়েৎ। “গুডমাইসিন” বুরু রেগে মেনাঃ মেঁড়হেৎ ধিরি 

রেল ডাবাতে আগুঃ কানা অনা ভারি ভারি। 

নন্ডে মেনাঃ কারখানারে রকম রকম মিশিন 

অনা ধিরি নন্ডে যত ভাটারেক ইসিন।

কল কব্‌জা লাড়াঃ কানা অত্ সেরমা কাঁপা 

অড়েচ পাড়াঃ সাড়েকানা বানুঃ অনা তপাঃ। 

অনা এড়ং কারখানারে মেনাঃ পেয়া খিপ্‌টী 

হাজার হাজার হড়ক বলন অনা অনা খেপ্‌টী। 

নুমিন নুমিন হড়ক বলন বৗনুঃ আনাং গুজার কারখানারে বল কাতে বাং ঞাম্ আ খজার। বলনাক হারে ফারে কৗমি রেক ভেজাঃ 

নংকা কাতে মিশিন রেনাঃ কৗমি কদ জজাঃ। ইসিনাক যত ধিরি ছাঁচরে অনা দুলুঃ 

নোকো রেয়াঃ অনা কামি তিসরেই বাং ভুলুঃ। 

রেঁদা রুকৗ আগর ভমর হোয়োঃ কানা করাত সামায়াক দিশম রেয়াঃ হরেক রকম বরাত। 

বেনাঃ কানা গাঁধি কুড়ি অড়াঃ দালব করকট রিম-বরগা হোয়োঃ কানা চেৎ তেঁহ বাং ছরকেট। আঁড়গো রাকাব বানাগাড়ি চটতে থাপা থোপো কারখানারে ইঞ্জিন লাড়াঃ সাডে হাহো পাপো ৷ 

ঝাঙ্কা ঝাকুর কিরিন গাড়ী হিজুঃ সেঃ চুরমার 

ভারি দুরিব তুলাই তারিখ আদ আকার কুকার। বহঃ চেতান বিজলী রেয়াঃ তারক আটাল আটাল। আক রেয়াঃ মনের কাথা অনাতেক লৗই চাল। সাবরনাকা নৗই দাঃগে কারখানাতে বলন 

অনাগেচ লাগাঃ লাড়াঃ সানাম কৗমি চলন। 

সেরমা রিমিল ঞুৎগে ঞেলঃ গটাপাড়া ধুঙাঃ 

নঙ্কা কাতে দিন দিনগে সিঙ্গে ঞিদা গঙাঃ। 

কাজ কারবার হেপা জোতোঃ মোঃ তাক আফিস। কারখানাগে চালাও এদায় অনা রেয়াঃ তাপিস। অৗডি অৗডি বাবু ভায়া নড়ে গেক খাটাঃ 

কুলি কামিন পুইসৗ তাক হিসাব নডে গটাঃ। 

আরই নোকো বাবু কওয়াঃ ডেরা নাপায় দালান হরেক রকম হেঁদে আরাঃ বাহা অনা অলান।

বহঃ চেতান ভেনের ভেনের আচুরঃআ পাঙখা 

আক রেয়াঃ মনে জিউয়ি সানাম পুরৗ আঙখা। 

কল করেনাঃ কৗমি কাথা আঁজম তেগেম হাবাঃ ভাবনা বতর সেটেরামা মেঁৎতে যুদিম তেবাঃ। 

লৗই তেহঁ বাং চাবাঃ কাথা যত অরতো গোঁড়ে‍ৎ নওয়া এড়ং টাটা রেগে জানামঃ আ মেঁড়হেং।

writer by:- sadhuramchand Murmu