ইঞাঃক মেৎতে বুরু পাতা   Buru Pata 2023|BaraGhat Buru Pata |বুরু পাতা | বাড়াঘাট বুরু পাতা                     

বাড়াঘাট বুরু পাতা

  

বুরু পাতা দুল দুল চল দিদি ঞেঞেল বন চালাঃ আ । নওয়া পরব সেরেঞ খনগে বুরু পাতা সে বুরু বঙ্গা রেনাঃ ওপোরোমদ আডি তেৎগে ঞামঃ আ । বুরু পাতা হরতেম মহডা লেনখান নেতার হঁ রুশিকা হড়াঃ মনেরে নওয়া সেরেঞদ উফলৗঃ গেয়া আর সেরেঞ গেয় চিনহৗপ কওয়া নুকু হড়দ বুরুপাতা ঞেঞেল ক চালাঃ কানা । দিন হিজুঃ আ দিন চালাঃ আ বছর হিজুঃ আ বছর চালাঃ আ । অনকাগে বুরুপাতাহঁ বছরগে নওয়া নওয়া রূপতে সাজাও কাতে হিজুঃ আয় রুশিকা কঠেন রৗস্কৗ রেনাঃ অসাঁভেড় রাসা আগু কাতে । বিহার বেঙ্গল সীমৗরে মেনাঃ কৗনৗই -সর বুরু । অনা বুরুরেগে আষাঢ় বঙ্গা রেনাঃ তেসার শনিবাররে বঙ্গা হোয়োঃ আ । অনাগে বুরু বঙ্গা দ । আষাঢ় বঙ্গা সেটের লেনখানগে রুশিকা কওয়াঃ মনেরে ঘানে ঘানে বুরু পাতাদ ডোডেয় হিজুঃ আ ।                                      

                                    

বুরুপাতা

অকয় বায় রৗস্কৗ আ ডোডে ডোপোডেয়াতে বুরু পাতা ঞেল ? ইঞ হঁ মিৎ গাতেয়াঃ ডোডেতে মহডায়িনৗঞ কোলকাতা খন বুরু পাতা সে বাড়াঘাট ঞেঞেল । নডে কাটিচ লৗই লাকতি কানা বুরু পাতা সে বুরু বঙ্গা আর বাড়াঘাট মুদরে ফারাক দ বানুঃ লেকাগে । বুরু বঙ্গা দশার হিলঃ বুরু খন ছাডাঞঃ বাড়াঘাট আতোরে পবর এনেচ হোয়োঃ আ । অনাগে বাড়াঘাট দ । অনা

 বাড়াঘাটগে সানাম রুশিকা কওয়াঃ মনেরে লাঠা মেনাঃ আ । রবিবার সেতাঃ হাওড়ারে ইস্পাত এস্প্রেস ইঞ সাব কেদা । গাডীরে দেজ সাঁওতে ইঞাঃ মনেদ অৗনৗড়ি হরতে বাড়াঘাটতেয় সেটের এনা । মনেরে তাপিঞঃ কানা রৗস্কৗ সাঁওতে সেটেরঃ কানা কুকলি বাড়াঘাট ইঞ সেটের দাড়েয়াঃ আত ? চেদাঃ সে হড়াঃ মচারে আঁজম বেগর বাড়াঘাট দ তিশহঁ বৗঞ ঞেল আকাদা । হড়াঃ মচারেঞ আঁজম আকাদা আডি জাঁকলো পরব । আডি খেচড়া হড়ক জাওরা আ আডি আঁট রৗস্কৗ ঞামঃ আ । যাঁহা রৗস্কৗ খাতির আষাঢ় বঙ্গা রেনাঃ ঝিটিক দাঃ সাঁওতে হুলিই জাপুৎ হঁ দেয়া গদঃ আ । গাড়ীরে বাড়াঘাট রেনাঃ কুকমু ঞেল ঞেল তেগে ঝাড়গ্রাম ইঞ সেটের এনা । ঝাড়গ্রাম খন বাসতে শিলদা অঁডেখন গাতে কড়া সাঁও পেড়া অড়াঃ লিঞ চালাও এনা ।

                                      

টামাক রু রুশিকা

তোপো জম জিরৗও কাতে শিলদৗরে বাস সাব হোয় এনা । শিলদা খন নারানপুর পাঁচ দশ মিনিট হর । নারানপুর চকরে যখন লিঞ আঁড়গোয়েনা উনদ ইঞাঃ ঘড়ি দুটা বাজাঃতে কুড়ি মিনিট বাকী মেনাঃ আ । নারানপুর চক সেটের সাঁওতেঞ ভাড়ুমভাঃ এনা । মনে হোয়োঃ কানা নন্ডেগে পরব লাগাও আ আকান লেকা । কুড়ি কড়া হাড়াম বুড়ি গিদৗর পিদরৗ দমেল দমেলক মহডা কানাঃ বাড়াঘাট সেৎ । মিৎ হাড়াম হড়াঃ তিরয়ৗও রাহা রেনা পরব টাঁন্ডি বলন কান লেকা আইকৗও এনা । তারেনরে অডেচ ঝলা গঃ কাতে তিরয়ৗও বরগাও রগড়াওতে পাওড়ী আকাদায় মিৎ দৗড়য়ৗ পুরুধুল হাড়াম । আলিঞহঁ হড়াঃ তাড়াম ডাহার স্যেৎ কয়ঃ কাতে চাদাকান রেলিঞ দুড়ুব এনা । আলিঞ লেকান মিৎ অৗনৗড়ী 

                                      

হড় চা-দকানরে দুড়ুব আকান মিৎ হড়ে কুলি কেদেয়া —আচ্ছা দাদা বাড়াঘাট এখান থেকে কত দূর ? উনি হড়ে লৗই রুয়ৗড় কেদা কম করে এখান থেকে ঘন্টা তিনেকের রাস্তা । গালমারাও তিন কিনদ বানা হড়গে সান্তাড় হড় লেকাগেকিন ঞেলঃ কানা । এনহঁ দিকুতে গেকিন গালমারাও কেদা । কুকলি হড়াঃ মলিন মাছা মেৎ আঁহা ঞেল কাতে আলিঞহঁ আতরুঞ গেলিঞ বুঝৗও কেদা । আতরুঞ রেনাঃ কাথাগে চেদাঃ স্যে পে পে ঘন্টা তাড়ামদ সহলে দ বাং কানা । আরহঁ নেতারদ লৗই লেখান গটা পাহটাগে কমবেশী বাস যোগাযোগ রেনাঃ ব্যবস্থা মেনাতে হড়ক তাড়াম হারকেৎ খন মটর গাডী দেজগে সুকৗলোয় পৗরকৗও আকাদ কওয়া । মেন খান গটা পাহটারেদ সেনঃ হিজুঃ রেনাঃ ভাগে ডাহার বানুঃ রেহঁ সরকার বাহাদুরাঃ মেৎরে অনালেকাতে ঞুরু আ । মেৎরে পাড়াও লেখান হয়তো উনৗঃ আতরুঞঃ দ বাং হোয়োঃ আ ।               

                                     

তুমদা রুশিকা

 

ঝিপির ঝিপিরদাঃতে আরুবঃ কান আরাঃ কল্লাচ ডাহারতেগে তাড়াম হোয় আকানা বাড়াঘাট রেনাঃ হরতে আতরুঞ বুঝৗকানরেহঁ বুরুদিশমরে উসুল ধাড়সাং হরতে তাড়ামগে বুঝৗও কানা লাঙ্গাতে গহড়ঃ কান জাঙ্গাগে হহয়েদ বুরু সেৎ লাহা চালাঃ কানা ।

হর ধারে রেনাঃ ডুংগরি মেশা ডুবকৗক ঞেল ঞেলতে মিৎ সময়দ উচ উচু অনা হহাড়াঃ কৗনৗইসর বুরুগে সেটের উতৗরেনা । তিসহঁ বাং ঞেল বুরু ঞেল কাতে আডি হাহাড়াঃগে বুঝৗও এনা লাতারখন চেতান থারকে থার সাজাও আকানা বুরু রেনাঃ নানা হুনৗর দারেক ঞেলকাতে মনে হোয়োঃ কানা —-অকয়চ থারকে থার দারেক রহয় হট আকাদা । সানাম লেকান হড়াঃ রড়তে লান্দাতে আঁধোড় আকানা বুরু লাতার । জিরাও জিরাওতে পাশ পাশড়ি রেনাঃ বুরুক সেৎ মেৎ লিঞ টেরাং কেদা । মনে হোয়োঃ কানা অকয়গে চেতান সেৎ এ হারা রাকাব দাড়েয়াঃ আ অনা রেনাঃ হেপরাও চালাঃ কানা বুরু দেজঃ রেনা বারয়া হর মেনাঃ আ আড়গোন রেনাঃ হঁ অনাগে ।

 মিৎ হরতেদ আডি সহলেতে দেজঃ গানঃআ আর মিৎ হরতেদ আডি হারকেৎ কাতে দেজঃ হোয়োঃ আ । মেনখান অকয় বাড়ায় অনাদ পোইলোতে । যাঁহাতে দেজ হারকেৎ বুঝৗঃ আ অনাতেগে আলিঞদ পাউড়িলিঞ লাহা কেদা ‌। পৌইলোদ আডি সহলে গেলিঞ দেজ রাকাব এনা । তালা মালা লিঞ সেটের কেৎখান হয় হঁ আৎ এন লেকা বুঝৗও এনা লাঙ্গা থাকাও আকান হড়মরে অকয়চ বুলুং দাঃতে সড় এৎ লেকা বুঝৗঃ কানা । সাঁহেদহঁ বন্ধলেকাগে তিঙ্গুকাতে যখন লিঞ গালমারাও এদা—এ্যয়া আদ বাং আতালাং আ উন অক্ত মিৎটাং বুডি আজরেন দলবল আতে আডি সহলে গেয় আঁড়গো হিজুঃ কানা । আড়গো অক্ত ঞেল ঞাম কাতে মেতালিঞ কানায় এ্য বাবু তিঙ্গুয়নে দবিন লাগাও সাঁহিচ লাই বাং লৗই তেলিঞ লৗই কেদা হোয় পেড়া আয়ো আডি জোর লিঞ লাঙ্গা আকানা । লাজাও রেনাঃ কাথাগে চেদাঃ সে বুড়হি দেজ কাতেয় আড়গোন কানা আলিঞদ কড়া হড় দেজগে বাংলিঞ দেজ দাড়েয়া কানা । আতরুঞ মনে আর থকাও আকান হড়ম আতে লাজাওতে আরহঁ দেজঃ লিঞ এহব কেদা ।

                                   

ঢাক রুশিকা

                                      

আডি হারকেৎ সাহাও কাতে বুরু রেনাঃ ঢজরে লিঞ দেজ সেটের এনা । আরাঃ সালতে দালব মিৎ কুম্বৗ ধিরি লাতাররে মিৎ সাধুবাবায় দুড়ুব আকানা । সানাম হড়গে অনা ধিরি গডকাতে পয়সাক এম এদা আর সাবু বাবা গডকাতে উনিয়ৗঃ সিন্দুর টিকৗঃ মলংরেক টিকৗঃ হচঃ কানা । কয়ঃ বাড়া কাতে আলিঞহঁ ধিরিলিঞ গড আদা আর পয়সা এম কাতে সাধু বাবা আঃ সিন্দুর টিকৗঃ লিঞ টিকৗঃ হচয়েনা নাপায় সাহিচ পরব ঞেল আশতে । নডে লৗই তরা লাকতি কানা বুরু রেদ বঙ্গা হিলঃ গে হড় দক দেজ আ তবে নৗওয়ৗয়ঃ লেকা সে রৗস্কৗ জং লেকাদ দশার হিলঃ হঁ বুরু দক দেজঃ দেয়া । অনাতে নৗওয়ৗয়ঃ লেকা আলিঞহঁ বুরু লিঞ দেজ এনা ।

আড়গো কাতে তারাল বাসাল আকান হড় সেৎ লিঞ কয়ঃ কেদা তেতাং মনেতে । আডি হড় যেযার আক জারওয়া কাতে থুতি গালমারাও আতে পরব রেনাঃ সক ক ভুঁজাও জংকানা অকয়কদ মিৎ পাহটাখন আর মিৎ পাহটাক দাঁড়ান কানা । মিৎকঁড়রে তিরলৗ আঃ রাঃ মেসা এগের আঁজম এনা সোররে বায় তিঙ্গু টারহাও দাড়েয়াঃ কান মিৎ কড়া হপন রাঃ আতেয় এগের কানা । জানিচ ভাগে ঠিক বাংকিন ঞেল দাড়েয়াঃ কানা । আমদ কদক ডারহাও আকানা বুরু খন দক্ষিন পছিম নাখারে হোয়োঃ কানা পরব টাঁন্ডি সেৎ । পরব টান্ডিদ বুরু খন তারা ঘন্টা হর তাড়াম হোয়োঃ আ । আলিঞ হঁ বাং বিলমকাতে মহডায়েনালিঞ পরব টাঁন্ডি সেৎ ।

 আতরুঞ আকান মনেদ হড় কওয়াঃ লাঁদা রেঙ্গেচ দেয়া কাতে গুয়ডৗও চালাঃ রেনাঃ রৗস্কৗতে সাগেন রুয়ৗড় এনা । সেটের কেদা লিঞ লাহাখন আঁজম আগু আকাদ ঞুতুমান পরব টাঁন্ডি বাড়াঘাট ।লাহা খন আঁজম হিজুঃ কান রেগড়া টামাক রেনাঃ সাডে বুটৗরে । 

পোরোয় পোরোয় হড় কড়া কুড়ি হাড়াম বুড়ি আর কাটিচ বাবু মৗই তাকহঁ আরহঁ গাহিরঞঃ লৗই লেখান হড় চেতান হড় । পরব টাঁন্ডি ধারে ধারতে সাজাও আকান ছিমছাম লাডু দকান সেবেল দাকা উতু হোটেল দারাহারা সাইকেল স্ট্যান্ড সাঁওতে মটর সাইকেল স্ট্যান্ড পানবিড়ি দকান পত্রিকা রেনাঃ স্টল –মনে হোয়োঃ কানা লাহাতে বেনাও মেনাঃ মিৎ নাগার রেনাঃ বাজার লেকাগে । এন্তেরেহঁ নওয়াক ছিমছাম ঞেল কাতেরেহঁ মিৎটাং জিনিসতেগে সানামাঃ এতেন আকাদা—অনাদ হোয়োঃ কানা হাঁন্ডি আর পৗউরৗ পরব টান্ডি বার অনাগেয় এসেদ আকাদা । যাঁহাদ হড় ঠিক সাঁহিচ বায় তিঙ্গু দাড়ে হচ আক আকানা যাঁহা মহৎ আন দিশ হুদিশ আতে নওয়া পরব অনা বাং ঝালকাও কাতে পোয়দং উতৗর আকানা যাঁহা রৗস্কৗ ঞাম রেনাঃ কাথা অনাদ বাং ঞামঃ কানা বদলতে ঞামঃ কানা বাড়িচ অরসং । পরবরে ঞু ভাকুজকৗতে কৗইজৗ খৗপৗরী তালাতে এপের হেঁডেচ মৗনৗন আকিলান অলঃ পাড়হাও হড় হঁ পারাংগত বাংক ঞাম এদা নওয়া খন কড়া কুড়িয়াঃ সারি দুলৗড়রে আগুয়েদায় দুলৗড় রেনাঃ পেটেচ । ইনৗতে আকিলান -মহৎ আন হড় তাহেঁ কাতে হঁ মহৎ চিন্তৗরেনাঃ দাড়েয় দাল ঞুরেৎ তাকওয়া । হারাঃ কান বাবু মৗই তাকহঁ ভাগে জিনিস বাং ঞেলকাতে বে-বাড়িচ ডাহার তে পৗউড়ীরেনাঃ হুদিশ ক দিশৗতারা জং কানা ।

                                     

নাচনৗয়

দাঁড়া দাঁড়াতে মার্শাল গাঁওতারেনাঃ পত্রিকা স্টল ধারেরে তিঙ্গুকাতে পরব টান্ডি তালা সেৎ কয়ঃ হোয় আকানা । কড়া কুড়ি খিচড়ি কাতে এনেচ জং কানাক আডি মজগে কড়াকহঁ আডি লুহুক আতে রেগড়া ঢাক টামাক ক রুজং কানা । অনা তালতে লুহুক আতে এনেচ বুঝৗও কানা জাঙ্গা ছিলকাও গদঃ কানা । ঢাক রেগড়া রুতে অকয় লেকান হড়বায় হিলৗঃ আ । তিঙ্গু কাতেগে এনেচ রুরেনাঃ রৗস্কৗলিঞ ভূদৗও জংকানা । এনেচ সাব আকান আদমকদ এনেচ মকঞ কাতে কড়া কুড়ি তি সাপাব কাতে আখড়া খনক আডোক চালাঃ কানা আদমকদ তিসাপ কাতে এনেচ আটালরেক সাব উরিজঃ কানা ।

সারিগে নওয়া বাড়াঘাট দ আডি ঞুতুমান পরব কানগেয়া । মেনগানঃ আ বিহার বেঙ্গল সাঁওতে আয়মাহড়াঃ ঞাপাম টাঁন্ডি মিৎতে রৗস্কৗ ভুজৗও জংরেনা আখড়া লাকচার এপেম চাপাল রেনাঃ মিৎ মহৎ মিলন টাঁন্ডি জুমিদরেনাঃ সনৎ ঠাঁও কানরেহঁ -আবদ জানিচ অনকা লেকাতে বাং বন বেওহার এদা । অনাতে নওয়া রেনাঃ যথাৎ জঃ বেলেদ হয়ত বাং বন তগজ ঞাম এদা । ইঞাঃ মনেতেদ নওয়া মহৎ আন ঠাঁওগে বিহার বেঙ্গল হড় সাঁওতে আরহঁ আয়মা হড় কয় জুমিদ বনা লাকচার কিষৗঁড় রেনাঃ দাও এমাবনা সানাম স্যেৎতে বাডায় বাপাডায় এপেম চাপালরেয় সহৎ বনা ।।