Romantic Love Story Kahani 

                             

                        লিল শাড়ি

আতু সহরায় লাসাড়হেৎ তেগে সাঁওহেৎ দয় সেটের আকানা৷সাঁওহেৎদ আলে আতু কড়া কান গেয়ায়৷আচ বাবাওয়াঃ চাকরি খাতির কোলকাতা,সানাম গেক চালাও আকানা৷মেন গানঃ আ সংসার গেক ইদি আকাদা৷অনাতে কোলকাতা রেগেক তাঁহেনা৷আতু রেনাঃ অড়াঃ দুওয়ৗর দ আচ হপন বা তাক গেক ঞেলা৷অনাতে বাহা,সহরায়,ছাড়া বাক হেচ বাড়া আ৷আডি লাকতি পাড়াও লেনখান এমনি দিন করেদক হিজুঃআ ৷ নিয়ৗ সহরায় রেদ সাঁওহেৎ এসকার গেয় হেচ আকানা৷

            আডি রৗস্কৗ সালাঃ সহরায় দলে ঞেল সাঙ্গে কেদা৷তেহেঞদ জালে,সারেচ হাঁডি সামটাও লাগিৎ গে আলে কড়া কদ  হানি অড়াঃ নুই অড়াঃ হাঁডি দলে তলাশ বাড়ায়েদা৷চেতান কুলহি সেৎ খনলে আঁড়গ চালাঃ কানা লাতার কুলহি সেন৷লাতার কুলহি গে আলেয়াঃ মুচৗৎ ডেরা দ৷                   

Romantic Love Story Kahani লিল শাড়ি

 

        রাশি আতু,তালা কুলহি সেটের তেগেলে বেড়ায়েনা৷গঁসায় রেন হপন তেৎ সমায় ঠেনলে বলয়েনা৷সমায় দ জতরেনগে দাদা৷সমায় বাহু দ আডি ভজরিয়ৌ সাঁওতে সমায় হঁ৷অনাতে দা আঃ অড়াঃ রেদ ঞুয় আর বাম ঞুয় আডি রৗস্কৗম বুঝৗও আ ৷ সমায় দা আ অড়াঃ তেলে বলয়েনা৷বল তরাগে সমায় দা বাহুয় মেন কেদা—দেলা দুড়ুব পে৷

—হেঁ দুড়ুব আলে,মেন কাতে হাঁডে নাডে লে দুড়ুব বাড়ায়েনা৷

—অকাসেন খনয়া?আডি দোমেল দোমেল লদব লদব পে সেটের এনদ৷চেতান কুলহি চে লাতার কুলহি?

—চেতান কুলহি সেচ খনগে৷অনতে দলে সামটাও আগু কেদা৷লাতার কুলহি সেচগে বাকি মেনাঃ আ সাঁওতেঞ রড় তারা আদা,আচ্ছা বাহু সারেচ বারেচ দ মেনাঃ আসে বাং?

রাহা টাড়াং কাতে বাহুয় মেন কেদা—চেদাঃ দ বাং তাঁহেনায়া!হাতি লেকান সহরায় পারম এনা মেনতে ইঞৌঃ টুকুচ হাঁডি হঁয় ইদি তরায়া৷

—অনামা কাথা কান গে বাহু৷

—মিৎ ঘাড়িচ দুড়ুব পে৷

—আচ্ছা৷মেন কাতে কুকলিঞ দহগৎ কেদা,বাহু না দাদা দয় অকায়েনা?

—উনি হঁতয়া আপেলেকা গে অকা করেচং জালে হাঁডিয় জাল বাড়ায়েদা৷

—অনকাদ আলম মেনাসে না৷

—চেদাঃ বৌঞ লৌই আয়া,মাসে হানে সেতাঃরেয় অডক আকানা নিতহঁ অড়াঃ হিজুঃ রেনাঃ ঞুতুম গে বানুঃ তায়া৷

—হেঁ,তেহেঞদ বাংখান চেৎচয় কামিয়াম৷

—আপে যেলেকা উনিহঁ অনকাগে৷

—একদম ঠিক,কাথা কান গেয়া৷

            

Romantic Love Story Kahani লিল শাড়ি

—হাপেয়া গালমারাওগে বাড়তিঃ কানা ৷ লৗই কাতেৎ বাহুদ অড়াঃতেয় বলয়েনা৷মারাং গামলারে হাঁডি বডচ কাতে হহ কেদা—দেলা অড়াঃ সেনগে বলন পে৷আলেহঁ অড়াঃ তেলে বলয়েনা৷আটেৎ আকাৎ ঠাঁওরে যাঁহায় যাঁহা করেলে দাড়েয়াদা দুড়ুব এনালে৷জানালা সঝহে রে সাঁওহেৎ দয় দুড়ুব এনা৷অনা জানলা খনেম কয়ঃ লেখান মনেয়াম নওয়া লিল সেরমা মুচৗৎ আকানা অনা বুরু ধাসনা রে৷নানা হুনৗর বিঞক গিতিচ আকান লেকা তাড়াম ডাহার,পৗটয়ৗ আটেৎ আকাৎ লেকা খেত বৌদ,চিলি তানাঃক দুড়ুব আকান লেকা দারে ঝুড়৷ঞু য়েআঃলে,ভচর ভচর মেনাঃ লেগে,সমায় দা বাহু হঁ দমেয় গালমারাও আলে কানা৷এতহব আকাদায় কড়াক লাগিৎ বাহু৷আর তিনৗঃ দিন নংকা ডৗঙ্গয়ৗ তেপে তাঁহেনা৷এমান এমান…….৷ সাঁওহেৎ দ সামাং আকাৎ হাঁডি বাটিই রাকাব কেৎ তায়া ঞুঞু লাগিৎ,রাকাব বাটি রাকাব রেগে তাঁহেয়েনা৷মিৎ মনেতে জানলা সেচ কয়ঃ কাতে থির গেয় তাঁহেয়েনা৷সানাম গালমারাও হিড়িঞ কাতে উইহৗর রেনাঃ ডাহার তেয় দৌড় ইদি কেদা আজাঃ হুডিঞ

আতরা মনে৷

     নওয়া তিকিন বেড়া অকয় এনতে তাড়াম কেদা হুরলৌ হুরলি,ডিগলৗ ডিগলি,অটাং ইদিয়েদায় ডাহার ধুড়ি,চিলি কানায় ভালা বাঁদে লিল শাড়ি৷

                                      =চালাঃ গেয়া=

          অনলিয়ৗ:- Sakwa Mandi