Romantic Love Story Kahani লিল শাড়ি  

আতু অড়াঃ কান রেঁহ পেড়া লেকাগে সাঁওহেৎ দ।চেদাঃসে হিজুঃ আয় মিৎদিন তাঁহেনায় বার(2)দিন।হাপ্তা আওরি পুরৗঃ তেগেয় রুওয়ৗড় চালাঃ আ।নংকাগে নিয়ৗবার হঁ সহরায় ক চাবা বাড়া কাতেৎগে রুওয়ৗড় রেনাঃ কাথা।মেনখান রুওয়ৗড় চালাঃ রেনাঃ কাথাগেয় হিড়িঞ সারি কেঃআ।নিয়ৗবার গে ভাগিঞঃ তেয় বাড়ায় কেদা বাজার সাহার খন আতু দিশম তিনৗঃ রিলৗমালা তিনৗঃ নাপায়া।অড়াঃ খন অডক কাতেৎ সৗঁগিঞ সেনেম কয়ঃ লেখান বির বুরু,দারে নাড়িতে সাজাও আকান তিনৗঃ মঞ্জ ঞেলঃ আ ঞালাৎ ঞালাৎ আর অনাক সাঁও আতু দিশম,চেঁড়ে চুপড়িৎ,মানমি,জিয়ৗলি,তিনৗঃ মজ ক সভাঃ আ নওয়া লেগেজ লেমেঞ ধারতি পুরি সালাঃ রং বেরং হানা নাওয়াতে।      

Romantic Love Story Kahani লিল শাড়ি

       তেঁহেঞ সাঁওহেৎ আঃ মেৎ রে সভা আকান,মনে তালারে গাথাও আকান পিরিল পিরিল লিল শাড়ি।অনা লিল শাড়ি গে তেহেঞ হিড়িঞ হচ আকাদেয়ায় বাজার সাহার।অনা লিল শাড়ি তলাশ খৗতির আয়াঃ অন্তর জিওয়ি লিল শাড়িরেয় তল আকাদা।

             তেহেঞ চেৎ ইঞ মেনা?চেৎ লেকাঞ মেনা?নংকা গুনি ভাবিত গুনি ভাবিত তেগেয় কয়ঃ পারম কেদেয়া।মেনখান বুঝৗও গে বায় বুঝৗও দাড়েয়াদা চেৎ এ লৗই আ।তেহেঞ সুমুংদ বাং,নংকা আয়মা ধাওগেয় কয়ঃ পারম আকাদেয়া এন্ তে রড়গে বায় রড় কাওদেয়া।

তেহেঞ দ সাঁওহেৎ মনে গটা কাতে গেয় অডক আকানা।জাঁহাগে হুয়ুঃ,তেহেঞ দুঞ রড় আয় গেয়া।জাও লেকাগে তেহেঞ হঁ ঞাপাম।কড়াম ধাক ধাক বতর সাতালাঃ সাঁওহেৎ এ মেন কেদা—এ মৗই কাটিজ এম তিঁগুনা?

লাজাও লাজাও মেৎহা টেরা কয়ঃ আতে এ মেন কেদা–চেৎ?

–কাটিজ কাথা তাঁহে কানা।

–চেৎ কাথা?

উনিই রড় কেৎ খান সাঁওহেৎ দ উনিয়াঃ তায়ম তেয় তাড়াম কেদা।

–কাটিজ এম তিঁগু লেনখান আডিগে নাপায় কঃআ।মিৎ ঘাড়িজ।

–সময় বানুঃআ।লৗই হদ মে।মেন কাতে তাড়াম জাঁগা বৗই বৗই তেয় থির কেৎ তায়া।

        

Romantic Love Story Kahani লিল শাড়ি

             তেহেঞ আডি রৗস্কৗই বুঝৗও এদা সাঁওহেৎ।মনে-জিওয়ি হঁ রাওয়াল গেয় আটকার এদা।চেদাঃগে বায় বুঝৗও আ যাঁহা লিল শাড়ি আয়াঃ মেৎ রে ঝালকাও লেনা, যাঁহা লিল শাড়ি খাতির এ ধাঁওয়া ধাঁওয়ি লেনা,যাঁহা লিল শাড়ি আচ এ উকুত বুকুত এ কান তাহেন,যাঁহা লিল শাড়ি আচ এ উইহৗর হচয়ে কান তাহেন, যাঁহা লিল শাড়ি আজাঃ জাপিৎ এ ভাঁগড় লেদা,যাঁহা লিল শাড়ি আজাঃ মনেয় কুঁবড়ু লেদা,অনা লিল শাড়ি গে তিনৗঃ মজ উনিয়াঃ মেৎ মুখৗন,আজাঃ গঠন হড়ময় সভায়েদা।মেৎ রে মেৎ দহ কাতে দুলৗড় রেনাঃ সোহাগ আড়াং তেয় কুলি কেদেয়া–আমাঃ অড়াঃ দ অকারে মৗই?

–চেদাঃ?

–বাং,লৗই এৎ তাহেনিঞ…………।সাঁওহেৎ আ কাথা আওরি মুচৗদঃ তেগে উনিহঁ কুকলিই দহ কেদা–আমাঃ অড়াঃ দ?

–ইঞৗঃ অড়াঃ দ জজডি।

–ইঞৗ দ ধিরিঘুটু।

–ঞুতুম তাম দ?

–সোহাগি।

–পারিস দ?

–টুডু।আর আমাঃ?

–ইঞৗঃ ঞুতুম দ সাঁওহেৎ।সাঁওহেৎ সরেন।আডি গেম বিলম এনা।গাপালাং ঞাপামা।

–বৗঞ বাড়ায়া।  লৗই কাতে সোহাগি দ তাড়াম জাঁগায় লাহা কেৎ তায়া।সাঁওহেৎ হঁ বৗই বৗইতে অড়াঃতে রুওয়ৗড় লৗগিৎ এ মহডায়েনা।

                                      ” চালাঃ গেয়া”

                 

                অনলিয়ৗ:- Sakwa Mandi