Santali 2024 least Love Story kahani ধূড়ি সিঁদুর Part-9 

ঞিদৗ আঁগা অৗওরি আঁগাঃ তেগে সনতাঃ বাপলা কাথা ডাম ডাহেয়েনা। আপাত তেদ ঞুতুমান কিঁষৗড় হড় কানায়। সানাম মৗন মহত হাসা ধুড়িরে নিলৗও এন লেকায় অৗয়কৗও কেদা। একলা কড়া গিদরৗ চেদ এ মেতায়া। উইহৗর তাঁহে কানা অলঃ পাড়হাও সেড়া কাতে, নাপায় নাপায় চাকরী ক ঞাম অচ রেনাং। ইখৗন আতরা রেগে সানাম আশা ভরসা চাবা উতৗরেনা। দসার হিলঃ দ আপাতেদ দ সনত গেয় হহ সুর কেদেয়া আর অৗডি কিছুয় মেতাদ দেয়া।

বাবু সনত ঞেঞেল মেদ তুলুজ নংকান কৗমি দ বাং সোভা লেনা বেটা। অকা কৗমিঞ ভেজা লেদ মেয়া, অনামা বাম পুরৗও লেদা।’ সনত বহঃ তিরুব কাতের দুডুব থির আকানা।

                     

Santali least Love Story kahani ধূড়ি সিঁদুর Part-9

– বাবু উইহৗর লেখান চেদ হঁ বাং গানঃ আ। বেটা নওয়া বাহরে টুকুজ অড়াঃ ভিতির খাঁড় দ অৗডি মারাং পিড়ৗ হুয় দাড়েয়াঃ আ। অনাতে আম তেহেঞ ভিতিরতে ইদি রুওয়ৗড় কায়মে।

সনত আঃ মনে জিওয়ৗরে বাং সাহব লেনা বাবাহাঃ নংকান বৗড়িজ কাথা। মেন রুওয়ৗড় কেদায়।

-বাবা বাহরে টুকুজ কাতে ইঞৗঃ হড়ম হঁ ছুঁয়ৗত আকান দ? নওয়া বাহরে টুকুজ মাড়াং গিডি কাঃ মে।

– অলঃ পাড়হাও গিদরৗ কানাম। কাঁড়া লটজ লেকা জাঁহা রেগে লাঠা লেনখান চিকৗ গানঃ আ? যাঁহাঞ মেতাম কানা অনা কৗমি হয় আমা। সনত রৗগি ধারাতেয় মেন

রুওয়ৗড় কেদা- বাবা আমাঃ কাথা অহ সৗরি কঃ আ। মারাং বুরু জাহের আয়ো সানাম ক সৗখয়ৗত কাতে জাহের থানরে অৗলিঞাঃ সৗগুন বাপলা দ হয় সৗরি আকানা।

আপাত তেদ বহঃ আঁচুর এন লেকায় অৗয়কৗও কেদা। হারা হপন নংকায় কৗমিয়া মেনতে অহগেয় উইহৗর লাঃ আ।

-‘তেহেঞ খন বাবা মেনতে আলম হ-হ অৗ-ঞা। জাঁহা রে আয়ো-বাবা তাম মেনাঃ কওয়া অঁডেগে সেনঃ মে। ইঞৗঃ অড়াঃ করে দ বাং আ…………। রৗগি তাপতে অৗডি কিছুয় এগের বাড়া কেদা। সনত কে বেরেদ বৗগি কাতে বাড়গে সেন এ ওডোক এনা।

সনত হ বেরেদ কাতে আজাঃ খুঁদড়ী সেদ গেয় বলয়েনা। বাহাদ খুঁদড়ী ভিতরীরে দুডুব কাতে পারম আকান কাথা কয় উইহৗর আঁচুর এদা। সনত দয় কুলি গৎ কেদেয়া- ‘দুডুব থির এন দম?”

-‘ইঞ খৗতির আম ক এগেরেদ মেয়া।’

-উকুর বাং আ তো!

                   

Santali least Love Story kahani ধূড়ি সিঁদুর Part-9

-‘ঝতওয়াঃ ইঞ আজম আকাদা। বাবা রৗগিতেয় সেঁগেল চাবা আকানা। ইঞ খৗতির নওয়া সুলুক ঘাঁরঞ্জরে নেয়াও রাকাব কানা………………।

সনত বাহা কে বুঝৗও রেনাং অৗড়িজ এ চেষ্টা লেদা। মেন কেদায়- অনকা মিদ্ বার কাথা, আয়ো বাবা দক মেনগেয়া। তিনৗঃ দিন বাংক রড়া? আমদ কৗমি ক দিশৗয়মে।’ অনকা তে, বাহা জনঃ সাব কাতে জঃ রাচায় ছুটৗও এনা।

আয়ো বাবা মা অৗডিগে আড়িশ কিন বুঝৗও কেদা। ছৗডুওয়ৗ কুড়ি গিদরৗ আর ঞুতুমান অড়াঃরে। সানাম অৗতু হড়গে সিকিড় ক অৗয়কৗও তাঁহেদ।

বাহা আজ মামা হঁ মনে মনেতে অৗড়িশ মায় বুঝৗও লেদ গেয়া। মেন মা আর বাং এ মেন দাড়েয়াঃ কানা। নংকান অড়াঃরে, খাটাও দাড়েয়াঃ আয়চে বাং? অনা হঁ মনেরে হিদিজ দ তাঁহে কানগেয়া।

মড়ে তুরুই মাহা গতয়েনা। সনত আজ বাবায় উইহৗর লাঃ গেয়া ছাপাডাও কিন রেনাং। ইখৗন সানাম দিশম হড় ক বাড়ায় ঞাম কেদা। আর জাহের গাড়রে বাপলা মা হয় আকানা। অনকাতে সানাম উইহৗর কাথা উইহৗর রেগে তাঁহে সৗরিয়েনা। এঁগাত আপাত বানা হড়গে মনে কিন গটা কেদা। সাঁওতা রেনাং কৗমি হরা মাড়াং তরাওগে নাপায় কিন মেনকেদা।

জাঁহা লেকা রায়রিত অনকাগে সনত আজ বাবা অৗতু হড় জাওরা কাতে মিদ দিন বার হড় দ ভাদুডিহী অৗতুতেয় ভেজা কেদ কিনা।

বাহা তেকমা অৗতু হড় খন সাহারে। অকয় আতো হড় হঁ পাঁজা ঠেকাও মা বাংক হেজ আ। আক অড়াঃ হড় আর পেড়া হপন কতে গে কৗমি মা তরাও হুয়ুঃ আ। আদ নেডা দিনরে বার হড় পেড়া হপন হেজ কাতে কুলি কুপলি দ হয় এনা। ইতুদ সিঁদুর মা কিন চুকৗও আকাদা। নওয়া মা ‘অর ইতুদ’ লেকান কাথা। মেনখান আতো মড়ে হড় বাংতে পেড়া হপন কওয়াতে সানাম কৗমি তরাও হুয় আদ্ কিনা। সনত আজ বাবা হঁ সানাম দেনা পাওনা এম হুয় আদেয়া। চিকৗতে আতো হড়াঃ কাথা আর বাং সাঁওতা রেনাং নিয়ম হিসৗবতে, লৗগ রেনাং দ এমঃ গে হুয়ুঃ আ।

দিন সময় পারমঃ সাঁও সাঁওতে আয়ো বাবা আঃ রৗগি বৗড়তি ইদিয়েনা। মনেরে অৗড়িশ মেনাঃ রেহঁ, উনৗঃ উতৗর দ হপন কিমিন বাং কিন ছিতি বিতি লেস্ কিনা। সনত হঁ হোস্টেল ক ভেজা কেদেয়া। বাহা হঁ নাসে অৗড়িশ বাং এ বুঝৗও লেদা। আজাঃ হঁ’ উইহৗর তাঁহে কানা, সনত অলঃ পাড়হাও কাতে মিদ্‌ দিন হিলঃ মার্শাল ডাহারতে লাহাঃ রেনাং হুদিস এ ঞৗম দাড়েয়াঃ আ। আয়ো বাবা আঃ হঁ চেষ্টা কম দ বায় তাঁহেয়া।

বাহা দ নাসে নাসেতে অড়াঃ রেনাং সানাম কৗমিগেয় তরাও লেদ তাঁহেদ। হানহার হঞ-হার হঁ নাপায় তেগেয় বেওহার লেদ কিনা। নাসে হঁ দোষগে বাং কিন ঞাম দাড়েয়াদ তাঁহে। হিজুঃ সেনঃ পেড়া হপন কহঁ নাপায় অকজ গেয় দারাম লেন্ কওয়া। অনাতে বেওহার ঞেলতে সানাম পেড়া গেক হাহাড়া গদঃ তাঁহেদ। অলঃ পাড়হাও কুড়ি গিদরৗ চেদ্ তেহঁ কম মা বাংগে। মামা অড়াঃরে নাসেহঁ হিঁসৗ-সুয়াগে বাং এ চেদ লাঃ আ। অকয় হড় সাঁও অকা লেকা বেওহার দরকার অনকাগে শিখনৗত দয় ঞাম লেদা। অনকাতে হানহার হঞহারাঃ অৗড়িশ মনেহঁ আচার বেওহার ঞেলতে দায়া দুলৗড়রে বদল উতৗরেনা। নাসে দৗগি এনতে সাঁওতা তালরে দুলৗড় বাং এ ঞাম লাঃ আ। নাপায় নাপায় নাওয়া পেড়া হঁ অ-ইতৗদ্ গেক অৗয়কৗও কেদ্ তে বাং ক গৗডয়ৗও সৗরি লেনা।

                     

Santali least Love Story kahani ধূড়ি সিঁদুর Part-9

সুলুক ঘারঞ্জ রেনাং নাওয়া জিয়ন দ বাহা গেয় অৗচুররুওয়ৗড় কেদা। হোস্টেল খন সনত জাঁহা তিসগেয় হিজুঃ আ, কুসি মনেতেয় বিদৗয় গৎ কায়া। উইহৗর হিজুঃ রেহঁ একলারে মেৎ দাঃ জরঃ গেয়া। অকয় ঠেনহঁ বাং সদর কাতে আঞ্চার লুগড়ৗতেয় জৎ হাঁপি আ। আর মারাং বুরু ঠেন দিনৗম গেয় নেহরঃ তাঁহেদ যে ছাতা দারে নাপায়তেয় অলঃ পাড়হাও মা মেনতে।

অনলিয়ৗ:-ছাকুলাল মুরমু