Santal’s marriage and custom’s                    connected there with.

সান্তাড় সাঁওতারে বাপ্লা দ তিনৗঃ লেকানাঃ ? 

                                    

Santali bapla

 মৗনমি সাঁওতারে জিয়ন খান্ডাও লাগিৎ জুয়ৗন মিৎ কড়া গিদৗর আর মিৎ কুড়ি গিদৗর আকিনাঃ সাঁওতা আরি তালাতে আতো মড়ে হড় আতেঃ পোনয়াতি মিৎ কাকিনগে বাপ্লা বো মেতাঃ আ । সানতাড় সাঁওতারে বাপ্লা দ এ্যয়ায় গটেন মেনাঃ আ অনাঁকোদ‌ হোয়ঃ কানা যেলেকা —- ১/সার সাগুন স্যে কিরিঞ বাহু বাপ্লা । ২/টুংকি দিপিল বাপ্লা । ৩/ অর আদের বাপ্লা। ৪/ ঞির বলঃ বাপ্লা ৫/ ইতুৎ সিঁদুর বাপ্লা ৬/ সাঙ্গা বাপ্লা ৭/ কিরিঞ জাঁওয়ায় বাপ্লা স্যে ঘৗরদি জাঁওয়ায় চেতানরে অলেন বাপ্লা ক রেয়াঃ নাগাম কাথাগে লাতার রে গালচ হোয়য়েনাঃ 

(১)সার সাগুন স্যে কিরিঞ -বাপ্লা : 

সার সাগুন স্যে কিরিঞ বাপ্লা গে হোয় কানা সান্তাড় সাঁওতা রেয়াঃ যথাৎ বাপ্লা । চেদা স্যে নওয়া বাপ্লা সাঁওতারে চল মেনাঃ আ সানাম লেকানাঃ নেয়াম নেমাচার আরিচৗলি যেলেকা রায়বার সার সাগুন ছামডা মান্ডোওয়া । জাওয়ায় হরঃ ড মডাম এ্যমানকো আতেঃ অৗডি রৗস্কৗ সালাঃ নওয়াঃ বাপ্লাঃ সিগিল আ । তবে লাতাররে নওয়াঃ অল সদর লাগিত কানা যে নোওয়া বাপ্লারে রায়বারিচ গেয় বানার পাহটা রেনাঃ কাথায় এপেমচাপানকাতে বাপ্লা কামি হরায়সুসৗর অচয়া অনাতে নওয়া বাপ্লা দ রায়বার বাপ্লা হঁক মেতাঃ আ । সার সাগুন স্যে কিরিঞ বাহু বাপ্লারে বানার পাহটা কুশি কুপুসি কাতে জাওয়ায় হরঃ আর বাপ্লা দিন ক নেন্ডায়াঃ । 

আদ বাপ্পা বাপরে দিন তায়ম বানার পাহটা ছামডা মান্ডোয়াক বেনাওয়া । মান্ডোওয়া রেনাও জহঃ মান্ডোওয়া লাতারে গাডা কাতে পে কেচাক বেরেল সাসাং আদওয়াচাওলে দুবি ঘাস তামা পুইসা এ্যমানকো উল সাকামরে রেৎকাতে সুতৗমতে তলকাতে অনা গাডারেক দহকাতেঃ ক তপাকাঃ আ । আর অনা মাতকম সারজম ডৗররে বড় বেধাও কাতে অনাচেতান হাসাকো লাগাওয়াঃ আ অনকাতে মান্ডোওয়া বেনাও মটতঃ আ। নেন্ডা দিন হিলোঃ সিঙ্গৗড় বেড়া বাহুকুড়ি আর জাওয়ায় কড়া কিন দ আপান আপিন অডাংরে সাসাং ক অজঃ অৗকিনা । অনাতায়নম আতোরেন জগ মাঝি ডাঙ্গুওয়া তিরলৗ হপন কোয়াতে দাঃ বাপ্লায় সেনঃ আ । সাঁওতে তাঁহেনা মিৎ জোড় সাগুন ঠিলি চুকৗরে হুড়ু দুবিঘাস আদওয়াচাওলে সুনুম সিন্দুর আর জাওয়ায় স্যে বাহুয়াঃ সাংসাংতে গাবাও লুগড়িহঁকো ইদিয়া আর বাহু  স্যে জাওয়ায় রেন এ্যঙ্গাতকো দ আঃসার কৗপি টাঙ্গি এ্যমান আতেঃ দাঃ বাপ্লায়াকো ‌। নতে বৗয়িরৗত চালাঃ মাড়াং জাওয়ায় আপাৎ বঙ্গাবুরু আর বঙ্গা তানাও আকান হড়কোওয়াঃ ঞুতুমতে হৗন্ডিয় চড়র আকোওয়া বাহু অড়াঃ জাওয়ায় সেটের লেনখান পায়রা এ্যয়াকো । পায়রা তায়মতে জাওয়ায় কড়ারেন অচ তেয়াৎ জাওয়ায় এ্য ঘড়াও আয়া তায়মতে বানাহড় উল টৗউরৗ রেনাঃ দাঃকনি ইরচি জং আ । আর বাহু বকততেঃ জাওয়ায় কড়া আ নাওয়া লুগড়িচতে দৗহড়ি আয়া আর বানা হড়কিন জহার জংআ । বাপ্লা আখড়রে বাহুকুড়ি মিৎটাং দৗড়উয়ৗতেক লাদে আগুয়ে আ আদ অনা আখড়ারে পেধাও আচুর কাতে জাওয়ায় কড়া সিন্দরাদান লাগিৎতে সারজম সাকামরে রেৎ তাঁহেন সিঁদুর সিঞ বঙ্গা সাঁক্ষীদহয়কাতে সিঁন্দুরায়া হরাসিরে সাঁও সাঁওতে আখড়ারে সেটের আকান সানাম হড় হরিবোল মেন্তক বাখেড়া । এ্য হিলোদ বাহুকুড়ি অড়াঃরে জমকু আর এনেচ সেরেঞকাতেঃ দশার দিন দ বিদৗয়কো হাতাওয়া ।বিদৗয় মাড়াং জহমাঝি জাওয়ায় কড়া বুঝৗও আয়া যে মা বাবা তেহেঞ দ কাশ্মার টটকলে তলাৎ মেয়া সেঁদরারে কার কারেম চালাক আ জাং জাং দ জমমে আর জেল জেল দ আগুইমে রুয়ৗকরে হাসো করে সুকরে দুকরে জুরিজতা বাড়ে তাহে কবিন । তেহেঞ দ জাং হঁ জাং তরচ হঁ তরচ এম কিরিঞ কেদা ।

                                      

Santali bapla

(২)টুংকি দিপিল বাপ্লা :

সাঁওতারেন যাঁহায় দমেক রেগেচ গেয়া সৗত সাপড়াওকাতে বাপ্লা রেনাঃ দাড়ে বানুঃ তাকোওয়া ওনকো দ রৗস্কৗ চরমজ তালা তেজ বাংক দাড়েয়া আ অনাতে ওনকো নংকান ক বাপ্লা আ । নওয়া বাপ্লা রেদ বানার পাহটা কুশি কুপুশি কাতেগে হোয়ঃ আ । তবে টুংকি দিপিল বাপ্লা রেদ জাওয়ায় আপাত বৗরয়ৗত আতেৎ দ বায় চালাঃ আ । বাহু অড়াঃ মেন খান তবে রায়বৗরিচ আতু রেন মঁড়ে হড় আতেৎ বাহু অড়াঃ তেয় সেটেরঃ আয় আর বাপ্লা কামি হরা দ জাওয়ায় অড়াঃ রেগে সিগিলঃ আ নংকান বাপ্লাগে টুংকি দিপিল বাপ্লা ক মেতাঃ আ।

(৩)অর আদের বাপ্লা: 

যাঁহায় কড়া গিদরৗ যদি বাহু কুড়ি গিদরৗ চেয়ে কুশি আয়া আর বাহু কুড়ি পাহটা যুদি বাপ্লা বাংক রেবেনা তবে কড়াদ আচরেন বারয়্যা গাতে য়াতে বাহু কুড়ি জোর কাতেঃ আগুয়োয় নওয়াগে অর আদের বাপ্লা দ । লৗইতরা লাগিৎ কানা যে নওয়া বাপ্লা রে বাহু কুড়ি আপাত আতুরেন জগ মাঝিয় লৗই আয়া । আদ জহমাঝি জাওয়ায় কড়াওয়া অড়াঃরে খবর এ্য হাতাও আ । এ্যটাঃ আতুরেন জাওয়ায় কড়া খান জগমাঝি অন্ডেনিচ মাঝি হড় সাঁও ওনকো অড়াঃ তেকো চালা আ আরক গাল মারাও গটাঃ আ । আদ বাহু কুড়ি যদি বাপ্লা বায় রেবেনা এন্ডেখান জাওয়ায় কড়া কো ফুরৗনেয়া আর রেবেন খান বাহু-পন তেৎ ঞাম কাতেক বাপ্পা কাকিনা ।

(৪) ঞির বলঃ বাপ্পা 

নওয়া বাপ্লা অর আদের বাপ্লা ঘনাঃ ঠিক উল্টৌ । যেলেকা কড়া কুড়িয়া যদি দুলৗড় দুপুলৗড় তাঁহেন তাকিনা এনখান জাওয়ায় কড়া পাহটা যুদি বাহু কুড়ি বাংক কুশি আয়া তবেখান বাহুকুড়ি জগমাঝিয় লৗইআয়া আর অড়াঃ দুয়ৗর লাগিৎ জাওয়ায় অড়াঃতেক মড়ে হড় পাঁজা সেটের কো চালা আ আরক জিম্মা অটকায়া ।

এনখান জাওয়ায় পাহটা অড়াঃ হড় বাহু কুড়ি অৗডি গটাং কচলন ক এমায় এনখান অনায় যুদি সাহাও কেয়া তাহলে খায় তাঁহে উরিচ‌ এনা আর যদি বায় সাহাও কেয়া তবে অন্ডে খানঃ দৗড় তেয় বাধ্যয়াঃ । আদ তাঁহে উরিচ লেনখান আতো মঁড়ে হড় সাঁও গাল মারাও গটাঃ কাতেঃ ক বাপ্লা কাকিনা নংকান বাপ্লা দ ঞিরবলঃ বাপ্লা কো মেতাঃ আ । বাপ্লা রেনাঃ সানাম খরচ জাওয়ায় কড়া পাহটাগে এমহোয়ঃ তাকোওয়া ।

(৫)ইতুৎ সিন্দুর বাপ্লা : 

ইতুৎ সিন্দুর বাপ্লা দ হুয়ুঃ কানা জোর জুলুম কাতে বাপ্লা ঞির বলঃ বাপ্লা খনা উল্টো । যুদি কড়া কুড়িয়া দুলৗড় দুপুলৗড়হোয় কাতে যুদি কুড়ি পাহটা বাপ্লা বাংক রেবেনা এন্ডেখান কড়া হপন ফাঁক ঞাম কাতে কুড়ি হপনাঃ হরাসিরে সিঁন্দুরায়া । কাথা হোয়ঃ কানা সান্তাড় সাঁওতারে যাঁহায় মিৎটাং কড়া যুদি মিৎটাং কুড়ি সিঁন্দুরায়া তবে উনিদ উনিরেন বাহু মেনতেয় লেখাঃআ । তবে তাঁহে বায় রেবেন লেনখনে উনিদ ছাডউয়ৗ মেন তেয় লেখা গটায়াঃ আ । আর যুদি বানার পাহাটা কুশি রাজি হোয় লেনখান দহড়াতে সার-সাগুন বাপ্লা লেকা ছামড়া মান্ডোওয়া কাতেঃ বাপ্লা হোয়ঃআ । নওয়া বাপ্লাগে ইতুৎ সিন্দুর বাপ্লা মেতাঃ কানা ।

(৬)সাঁঘা বাপ্পা: 

রাঁড়ি আর ছৗডওয়ৗ কোওয়া নংকান বাপ্লা হোয়লেখান নওয়াদ সাঁঘা বাপ্লা ক মেতাঃআ । তবে জাওয়ায় পাহটা রাঁড়ি ছাডউয়ৗ এমান চেৎ ডৗঙ্গুয়ৗ হয় হোয় দাড়েঃ আ নংকান বাপ্লারে জাওয়ায় পাহটাগে পনদ লাগাও কোওয়া। বাপ্লা অক্তে জাওয়ায় মিৎটাং পুঁড় বাহারে পেধোও এ সিঁন্দুরাঃ আ আর অনাদ বাহুওয়া সুৎরেয় রেবেৎ আয়া । বাহু দ বায় সিঁন্দুরায়া ।

কাথাচ সাঁঘা বাপ্লা রেদ আতো মড়ে হড় ভজ এমঃ বাংলাগাঃ আ বাপ্লা অক্তে সেটের আকান হড় বার টুকুচ হৗন্ডি এমাওয়াক খানগে হোয়ঃ আ ।

                                       

(৭)ঘৗরদি জাঁওয়ায় বাপ্লা স্যে কিরিঞ জাঁওয়ায় বাপ্লা : 

নওয়া বাপ্লা দ হোয়ঃ কানা ঘৗরদি জাঁওয়ায় দহ নওয়া রেদ জাওয়ায় পন এম কাতে দহ যাঁহায়রেন এ্যকেন কুড়ি গিদৗর কোগে মেনাঃ কোওয়া ওনকোগে নংকান কো বাপ্লা আ । নওয়া বাপ্লা দ সার সেগুন লেকাগে হোয়ঃ আ তবে বাপ্লা তায়ম জাওয়ায় বাহু অড়াঃরেগে তাহেন লাগাওয়েয়া । নওয়া গে ঘারদি জাওয়ায় বাপ্লা মেতাঃ আ ।

সেদায় হাপড়াম কোওয়াঃ সিরজৗও এয়ায় গটাং বাপ্লা সান্তাড় সাওতা রেয়াঃ মিৎ বেতার স্যে ঐতিহ্যয় তরাও আগুয়েদা । যাঁহা খাতির আবো সাঁওতা নিত অক্তহঁ খেরওয়াল সাঁওতা লেকাতে উপরুমঃ কানা ।।