দাঁশায় চেদাঃ বন দাড়ান আ ?

দাঁশায় দাড়ান রেনাঃ কাথা ক তুলৗ যখা কাতেৎ মানতাম অনলিয়ৗ ডঃ রামচন্দ্র মুর্মু তিকিন দ তেতেৎ তুমৗল পতব তালাতে দাঁশায় দাড়ান রেনাঃ কাথা কিন লৗই আলাদা । অল পুষ্টৗও আকাদা যে মানওয়া ক মিৎ অক্তে চৗই দিশোম রে আডি সুক সাওয়ারতে ক তাহে কান তাহেৎ আ । অনা সুলক ঞেল কাতেৎ আর্য কদ বাংক সাহাও দাড়েয়াদা অনাতে অনা চৗয় গাড় রেনাঃ অতেৎ রে যাহা তিনৗঃ জ বেলে ক সাওতে ধন দরিত তাহে কানা অনাক আকওয়াঃ( আর্য) লাগানতে চৗয় গাড় হড় সালাঃ তুপুৎ তাপাম ক রিকৗ কাদা । মিৎ বার ধাও তুপুৎ তাপাম তায়ম মিৎ ধাও হঁ বাক দাড়ে লেনা ।

আর্য ক চৗয় গাড় হড় সালাঃ বাং দাড়েঃ রেনাঃ কাথা দ তাহে কানা  আর্য ক সালা তুপুৎ তাপাম অক্ত ক তুপুৎ তাপাম তাহে আ আর কুড়ি হপন ক মুদরে পায়/আয়ন আর কাজল দ অনকান হুল গৗরয়ৗ কিন তাহে কানা যাহায়া দাড়ে তুপুৎ তাপাম রেনাঃ কায়দা সাঁওতে রঙ্গাবুরু কওয়া থুম দাড়ে উন কিন ঠেন তাঁহে কানা । অনা খাতির গে আর্য ক তুপুৎ তাপাম রে বাংক দাড়েয়াঃ কান তাহে কানা । নওয়া কাথা আর্য ক ক বাডায় ঞাম কেৎ তায়ম আর্য ক উনকিন আৎকির রেনাঃ কুরুমুটু কেদা । মিৎ অক্তে ভাদর বঙ্গা চাবাঃ দেলা দিল নায়ম আর কাজল দ নৗইতে তপুন কিন চালাও লেন তাহে কানা । অনকান অক্ষরে আর্য ক হেজ কাতেৎ আয়নম আর কাজল দক আৎকির তেৎ কিনৗ অনা নৗই পারম আর্য কওয়াঃ তাহেন জায়গাতে নওয়া খবর মিৎ মাহরা গিদৗর চৗয় গাড় রে এম কেৎ তায়ম গে দেবী দুর্গৗ কড়াকিন দ নায়ন আর কাজল সাঁওতে দুলৗড় সৗগৗই তাহে কান তাকিনা । অনাতে খবর ঞাম সাঁও সাঁওতে পাঞ্জা কিন বাহের লেনা অনা তায়ম চৗয় গাড় হড়ক নায়ন আর কাজল পাঞ্জা লাগানতে আঃ সার কাপি সাঁওতে রাতে চালাঃ ক রিকৗ কেদা । মেন খান নৗই আড়ে সেটেরঃ তেদ ঞেল কেদা নৗই বান আকানা আর সের্মা খন দাঃ এ জাড়িয়েৎ গে তাহে কান মেনখান আক বাংক পারম দাড়েয়াঃ রেহঁ বাডায় ঞাম কেদা কযে কাথায় আবরেন গে বার হড় দেবী আর দুর্গৗ ঞুতুমমান কাপড় গিদৗর দ লাহাতে নৗই পারম কাতেৎ পাঞ্জাকিন চালাও আকানা আয়নম কাজল লাগিৎতে ।

চৗয় দিশোম রেন হড় ক নৗই বাং ক পারম দাড়েয়াঃ খাতির আতো দিশোম তেক রুওয়ৗড় হেজ এনা । আর মিৎ দুড়ুব ক দহ কেদা গুরু ক জেলার সাঁওতে দিশোম হড় কওয়াঃ । আর অনা দুদড়ুব রেক ঠৗওকৗ কেদা যে কাথায় নিয়ৗ অক্তদ গেল বার সিঞ গেলবার ঞিদৗ দাঃ জাড়িতে সাড়ের আকানা অনাতে অনা দাঃ ক শায় লেন তায়ম আব দ নায়ন কাজল পাঞ্জা কিনৗ সাঁওতে দেবী দুর্গৗ পাঞ্জা বন সেনঃ আ ।

আর সাঁওতে আঃ সার কাপি সাঁওতে অনকান তুপুৎ তাপাম তেনাঃ হৗতয়রি বন ইদি জং আ ।মেনখান অনা ক ঞেল কাতেৎ আর্য ক আল ক ঠিকৗ দাড়েয়াঃ বন মা। আর জাহায় ক পান্থা বন সেনঃ আ উনকু কদ কুড়ি হপনাঃ সাজতে সাজাও কাতেৎ বন চালাঃ আ । আর আর্য কওয়া দুওয়ৗর দুওয়ৗর দাড়া কাতেৎ আররেন গুরু ক সাওতে নায়ন কাজল দেবী দুর্গৗ কওয়াঃ ঞুতুম তে দুঃখ আড়াং তে রাঃ হমর আনতে বন দাড়ানা । যাহা রাঃ হমর দ আর্য ক আবওয়াঃ সেরেঞ মেন্তে ক বাড়ায় মা । আর দেবী দুর্গৗ আর নায়ন কাজল পান্তেরে দুওয়ৗর দুওয়ৗর‌ যাহা বন অয়ুং আচুরা নওয়া দ আর্যক আবওয়া এনেজ মেন্তে ক মনে মা । নওয়া ক কাথা গে গুরু চেলা সাওতে চৗয় দিশোম রেন হড় ক ঠৗওকৗ লেদা । আর দাঃ শায় কাতেৎ দেবী দুর্গৗ আর আয়নম কাজল পাঞ্জা বন উডুঃ চালাঃ আ আর অনা পাঞ্জা রেনাঃ রড়ক গে দাঁশায় এনেজ বন মেতাঃ কানা । আর দাঃ আশায় অক্ত‌ গে দাঁশায় চাঁন্দবন মেতাঃ কানা ।

নওয়া এনেজ সেরেঞ দ আবওয়াদ সুক রেনাঃ দ বাং কানা । দেবী দুর্গৗ আর নায়ন কাজল ক আৎ আকান উনকু বাংক ঞাম আকানতে দুঃখ রেনাঃ কান দেয়া । অনাতে দাশয় এনেচ কড়া ক নেতার হঁ রাজা রে বল কাতেৎ এনেজ এতহব অক্তে মিৎ লেকাক বিন্তি বাখেড়া যাহা দাঁশায় আকান রিলৗমালা দেবী দুর্গৗ আর নায়ন কাজল দেলা স্যে আপে জালা রেলে জালা আকান উড়ুক এনলে কামরুল (রু) দেশ দিশোম হড় ।।