Santali kahani ধূড়ি সিঁদুর

তুপুন ঘাট, দাঃ লু ঘাট খন ছিলকাও দাঃ লেকা গটা পাড়া পাসনাও এনা বাহা মাই আর সাথেনাঃ কাথা। বিচার হয়ঃ আ ভাদুডিহী মাঝিয়াঃ ছাটকারে।

ধূড়ি সিঁদুর

সিঞ বঁগা লাহা ইদিঃ সাঁওতে, অক্ত হঁ বৗয় বৗয়তে সুর হিজুঃ কানা। ছেঁড়ে চিপরুদ্ দ সানাম জীব জিয়ৗলি আপান অৗপিন নালহা দিশম খন বাসা ডেরা তে রুওয়ৗড় লৗগিৎ ক সাপড়াঃ কানা। ইখৗন চিকৗতে চ যাও লেকা তেহেঞ চেঁড়ে চিপরুদ্  কওয়াঃ রপড় দ বাং তারকোঃ কানা? সানাম আতো হড়াঃ মনেরে মিদগে উইহার, বিচাররে চেদ হুয়ুঃ আ? সাঁওতা অৗরিচালিতে ঘৗরু ঘান্টু আকান রিলৗ মালা সান্তাড় সাঁওতা বাড়তি আর চেদ-এ উইহার দাড়েয়াঃ আ? আব দ সান্তাড় মেনাঃ তাবনা নিরৗড় সমাজ। অনাগে তেহেঞ আখড়া তালারে বাড়ায় ঞামঃ আ তিনৗঃ বাং নিরৗড় ?

তুরুই টাড়াং, আয়ুব বেড়া আখড়া আদোড় এনা। বুরুদ বুরুদ আতু কড়া সানাম ক সেটের তাঁহে কানা। মাঝি বাবা হয় সেটের এনা। তালা আখড়া রেক দুড়ুব কেদেয়া। হড় জাওরা ঞেলতে সিসির জৗয়িজ দয় লাঁদা জং কানা। হায়রে সাঁওতা! তেহেঞ বিধি বিধান রেনাং ধরম বিচার। হাহাড়া গেয় বুঝাও কেদা। বায় দিশৗ দাড়েয়াঃ কানা চেদ হুয়ুঃ আ? মেনখান উনিখন হঁ আবদব মারাং গেয়া। আবওয়াঃ বিচৗরণে মানাও হুয়ুঃ আ ।

ধূড়ি সিঁদুর

গাপাল মারাও এহব এনা। আবওয়াঃ রায়রিত লেকাতে জগ-মৗঝি কিনক কুলি

উদার কেদ কিনা।

“দেখি বাবা জগমাঁঝি কিন তেহেঞ মা অৗডি চেতান টলা, লাতার টলা বিন হহ জাওরা কেৎ বনা, চেদ দুখ, চেদ বিপদ, লৗই ওডোক কাথা ওডোক কাঃ বিন ?”- আতু কড়া কুকলি রেনাং তেলা লেকাতে জগ-মৗঝি কিন মেন দারাম কেদা– “হোয় অপুঞ আপে হ বাংপে কুলি লিঞ খান চেকা লিঞ লৗই সদর তালিঞা দুখ বিপন দ ?”

‘কাথাগে জগ-মৗঝি কিন’ – মিদ হড় দয় মেনকেদ আ। জগমৗঝি সানাম কাথা মিদমিদতে লৗই ওডোক কেদ আকিন ” কাথা ? জাঁহানাঃ দ বাং আ, মৗঝি বাবা। রিলৗ মালা সাঁওতা তালারে মেনাঃ বনা। সমাজ রেনাং রিতি নীতি তালম পারম দ অৗডিগে বাড়িজ হুয়ুঃ আ-সে চেদ লেকা ? ‘

মৗঝি বাবাহঁ জগ-মৗঝিয়াঃ কাথা লেকাতে মেন কেদ আয় ‘অনা দ কাথা কানগেয়া ।

সানাম কগে মৗঝি বাবাহাঃ কাথা লেকাতে ক হেঁ সৗরিয়াদা। জগ-মৗঝি টাটকা সৗঁহিজ কিন মেন কেদা ‘অনকাগে আব আতু সমায় হুপন সাগেন বাবু আর খেলা হপন এরা বাহা মৗই তিকিন বাহু জাঁওয়ায় এনেজ জং যখন, ধুড়িতে বাহা মৗই সাগেন ঠেন এ ইতুদ হচ আকানা। আতু হড় গেপে মেন দাড়েয়াঃ আ। নওয়াতে বগা বুরু চেদ ক উইহৗরা?’

সাঁগে হড় তালা খন তারকো রাকাপ এনা— ‘হেঁ অনা মাতো সাঁরি কাথা কানগেয়া আব দ, ধুড়ি তায় জবরা তায় ইতুদ মানেগে সৗরিরে লেখাঃ আ।

অনকাতে সমায় আর খেলা হঁক কুলি কেদ কিনা। “সমায় বাবু আর খেলা বাবু হপন মৗকিন কৗয় আকাদ গেয়া— “আদ আবিনাঃ উইহৗর দ চেদ?”— মৗঝিগেয় কুলি কেন কিনা।

সমায় আর খেলা বানা হড়াঃ মচা খন কাথাগে বাং ওডোকঃ কানা। নৗড়রী সানাম

রহড় চাবা আকানা। চাঁদো বঁগা চেদ ঝলিরেম ঝালি কাদ কিনা? সৗরিগে রৗপুন মলংরে

নওয়াগেম অল আদ কিনা ?

মিদ ঘৗড়িক আখড়া নিশুন এনা। ঞিদৗ চাঁদো আর রাকাব ইপিল কহঁ কয়ঃ থির কাতে বিচারক আঃতেন কানা। সমায় এ মেনকেদা — মঁড়ে হড় জাঁহাপে উইহৗরা অনাগে সৗরি বিচার দ। হপন মা তালিঞ

এ দোষ আকাদ গেয়া ।

খেলা কড়াম পসাঃ এন লেকায় আয়কৗও কেদা। আলাং হঁ বাং উল্টৗও লেনা। অন্তর জিওয়ী সানাম দুর-দুরৗও এনা। মাঝি বাবা আমগে বিচারমে। নুই নাবালক কুড়ি গিদৗর…………………………..।

চেদ কাথা হঁ  বাং এ পুরৗও দাড়েয়াদা, মেৎ খন মেদাঃ হিডির হিডির সেড়েঞ ওডোক এনা। অন্তর মনে রেনাং কাথা উদ রুওয়ৗড় কাতে হাপি থির এনায়।

কাথা দ সৗরিগে বাড়ায় ঞাম এনা। ধরম আখড়া রে তেহেঞ আতু হড় সামাংরে ঠৗওকৗ এনা, বাহা আর সাগেনাঃ বাপলা। তেহেঞ খন সাগেন আর বাহা মৗই জায় যুগ, জুরি-পারি সনের শিকড়ৗ তিকিন তল সৗরি এনা ।

মড়ে হড়াঃ বিচার আজম কাতে, খেলা বাবু  বাহা আপাত, বিন হুড়ুর বিজলী তে ঠের ঞুর আদে লেকায় আইকৗও কেদা। বৗয় বৗয়তে চেতান সেদ এ কয়ঃ রাকাব লেদা, চাঁদো আর সেরমা ইপিল ক ঞুরুঃ কান লেকায় বুঝৗও কেদা।

সামড়াও সামড়াওতেয় মেন কেদা — মৗঝি বাবা আর আতো মঁড়ে হড় ক, আপে

কঠেন ইঞাঃ মিৎ আরদাশ, কৗজ তালাং কৗই খাতির নুই হুডিঞ-হুডিঞ কুড়ি গিদরৗ আঃ জিয়নরে উন মারাং দাগী লাগাও একাল্ গে চিত্তা রেনাং কাথা কানা। মিদ মঁড়ে হড় কাথা রেনাং তেলা অৗডি লগন এ রুওয়ৗড় গদ কেদা — খেলা –

বাবু অবিনাঃ উইয়ৗরতে বিন বিচার খান কাথা বাং পাগঃ আ অনা লাগিদ মৗঝি মঁড়ে

হড় মেনাঃ কওয়া। উনকু গেত আসল বিচার হড়।

’

‘মঁড়ে হড় তালারে আলিঞ হুঁ মেনাঃ লিঞৗ। চেদাঃ এনখান অৗলিঞাঃ বিচার সৗরি বাং হুয় দাড়েয়াঃ আ?’ খেলা হাঃ মনেরে পেরেজ আকানা রাগি সেঁগেল। মিদ লেতাড়তে সানাম কাথা পুরৗও কেদ আয়- “মাঝি বাবা আম হুঁ যুদি ইঞাঃ জায়গারেম দুড়ুব কঃ আ! ইঞ লেকা গে দুঃখ এম আইকৗও কেয়া। আর নিজের জানাম কুড়ি গিদরৗ বান দাঃরে অৗতু গিডি দ অকয় আপাত হঁ বাং এ উইহৗর দাড়েয়াঃ আ।’

‘ মাৗঝি বাবা ই খেলা আঃ কাথা আজম কাতে মনেরে রৗগি রাকাব এনতে, মেনকেদায়’খেলা! গৗহির মনেতেম উইহৗর লেখান তেহেঞ আবরিন বঁগা বুরু বৗড়িজ বাং এম উইহৗর দাড়েয়াঃ ক-আ। নওয়া বিধি-বিধান ছাড়া আম যুদি আমাঃ তাড়াম হর ডাহার এম ঞাম দাড়েয়াঃ আ,ইনৗ খান ইঞ দ অহঞ বারন দাড়েয়ামা।’

ধূড়ি সিঁদুর

রৗগি তাপতে খেলা দ বাং এ সামড়াও দাড়েয়াদ আ মেনকেদ আয়— ‘মড়ে হড় জাঁহা গেপে উইহৗর কেদ। আপেয়াঃ বিচৗর তিস রেহঁগে বাং সৗরি দাড়েয়াঃ আ।’

রাগি তাপতে বাং রড়াঃ এম রড়া বাং কৗমিয়াঃ এম কৗমিয়া। তারমতে উইহৗর আচুর লেখান নিজেগে লাজাও বুঝৗঃ আ। মেনখান মচা খন ওডোক আকান কাথা, তুঞ সার লেকা চেকাতেম সাব দারামা?

অনকাগে খেলা আঃ কাথা আজম কাতে মড়ে হড় হাহাড়া গেক বুঝৗও কেদা! খেলা বাং এ উইহৗর দাড়েয়াঃ আ নওয়া রেনাং অর্জ বাং চেদ হুয় দাড়েয়াঃ আ । মঁড়ে হড়াঃ কাথা বাং আজম মানে নিজেরাঃ অড়াঃরে সেঁগেল লাগাও সমান। অনাগে সৗরিয়েনা। সানাম আঁতু হড় খেলা খন সাহারে তাঁহেন বুগি মেনতে ক মনেকেদা ৷

অনলিয়ৗ:- ছাকুলাল মুরমু