Santali kahani ধূড়ি সিঁদুর part-2

জানাম খন মাঁড়ঘৗটি হৗবিজ সাঁওতা ঘারঞ্জরে তাঁহে কাতে গে সানাম জিয়ন খেমাও হয় আবনা। জানাম আয়ো লেকা হেঁম হারা কাতে সানাম দুখ বিপদ অক্তেরে সাঁওতা ছাড়া অকয় হুঁ বাংক গড় আমা। অনাতে মেনদ সাঁওতা গে আবয়িজ আয়ো আর বাবা। খেলা বাবু তেহেঞ নওয়া সনের ঘারঞ্জ খন সাহারে তাঁহে কাতে দিন খোমাও হুয় আয় কানা। টুওয়ৗর গিদরৗ লেকা আয়ো বাবা আঃ দুলৗড় বাংতে একলাগে অন্তর রেনাং দুখ সেঁগেল নিজেরাঃ মেৎ দাঃ তেগে তিরপী ইড়িজ হুয় আয় কানা। রৗপুন‌‌ মলাংরে জাঁহা অল আকানা অনা দ হুয়ুঃ গেয়া। ঢুলৗ পেরেজ ধন, জম ঞুতে আনেজ ধানেজ অৗড‌ি নাপায় তেগে ঘারঞ্জ ঢগাঁ লেগেম-লেগেম ধৗরতি দরয়ারে পায়রা পারমঃ কান তাঁহেদ। মেনখান জিয়ন খান্ডাও লৗগিদ, লাজ পেরেজ জমাঃ সুমুং দ বাং- আ, মনে পেরেজ রৗস্কৗ অৗড‌িগে জরুরা।

Santali kahani ধূড়ি সিঁদুর part-2

দিন সময় বৗয় বৗয়তে পারম ইনিঃ কান তাঁহেদ। মনে জিওয়ৗরে সুখ বাং-আ। দিনৗম হিলঃ অড়াঃরে নেয়াও রপড়। খেলা চেদ আর বাং এ চেকা দাড়েয়াঃ? নিজের গিদরৗ গেত সুলুক ঘারঞ্জরে সেঁগেল এ সালগাও আকাদ । খেলা বাড়তি চেদ হঁ বাং এ উইহৗর দাড়েয়াদা। নওয়াদ মিদ মলং রেনাঃ এনেম গেয় মনেয়া। বাহা দ অৗডিজ এ দুলৗড়েয়া। সাদের কুড়ি গিদরৗ। মিৎ দিন হিলঃ নুইয়াঃ জিয়ন উমুল রেগে আসরাঃ হুয় আয়া। এঁগাতাঃ এগের দ সেঁগেল সার লেকা রিদৗয় রে বাজাঃ আ।

তারাসিঞ বেড়া। খেলা, চৗলিরে দুডুব কাতে বাবের এ পাঁপাক কান তাঁহেদ। আচকাগে মিদ্‌ কড়া গিদরৗ আঃ আড়াং লুতুররে তারকোয়েনা —- বাহা দ কাকা – সামাং সে এ কয়ঃ লেদা। সাগেন! তিঁগু কাতে কয়ঃ রেগেয় তাঁহেয়েনা।

বাবু বাহা দ আজ মামা অড়াঃ-এ সেন এনা আর তিস হঁ বাং এ হিজুঃ আ— খেলা আঃ মচা খন বাড়তি কাথা বাং ওডোক লেনা ।

“চেদাঃ কাকা! ইঞ বায়ঞ ইদি লিপিঞা?”

খেলা মনে মনেতেয় উইহৗর এদা, নুই নাবালক গিদরৗ চেদ এ বাড়ায়া আলে দ আতে হড় খন সাহারে? বাহা বাংখান মিৎ ঘৗড়িক হঁ একলা বায় তাঁহে কেয়া, চেদ এ মেতায়া!

Santali kahani ধূড়ি সিঁদুর part-2

সাগেনাঃ মনেরে উইহৗর হিজুঃ আ— আজ বৗগি কাতে বাহা অকা তেহঁ বাং এ সেন দাড়েয়াঃ আ। তেহেঞ একলা মামা অড়াঃ চেদাঃ এ সেন এনা। সাগেন বেটা বাং এ পৗতয়ৗও লেনা, দহড়া খেলাগেয় কুলি কেদেয়া।

“কাকা চেদাঃ বায় হিজুঃ আ? অকয় সাঁও মামা অড়াঃরের এনেজ জং কানা……?

অৗডিগান কুকলি জাঁহা রেনাং তেলা চেকায় রুওয়ৗড় দাড়েয়াঃ আ? এড়ে কাথা তে সাগেন

গে চেকায় পৗতয়ৗও হচ কেয়া?

ইনৗ অক্ত সাগেনাঃ আড়াং আজম কাতে বাহা দ বাড়গে সেন খন অড়াঃ সেদ এ হেজ এনা। সাগেন গে তিরে সাব কাতে তিয়ৗঃ ইদিয়েকান তাঁহেদ খেলা রাগি তাপিস তেয় মেন কেদ আ ‘বিটি সাগেন সাঁও গাতেঃ দ মানা গেয়া।

চেদাঃ বা ?’

বিটি………………..মানে…………. আব দ আতো হড় খন……..।

সৗরিগে খেলা আঃ আলাং গে বাং উল্টাও লেনা। চেদ্ এ মেতায়া? নি-টুকু

গিদৗর! চেকায় মানায়েয়া? চেদ হঁ বাং এ দিশৗ দাড়েয়াঃতে বাহা মৗই আঃ তি খন সাগেন গে অর সাহা কাতে দুওয়ৗর সেদ্ এ তিয়াঃ অৗগু কেদেয়া। মেতাদ দেয়া—— ‘দহড়া আর আলম হিজুঃ আ। বাহা দ ধিনৗং মামা অড়াঃ এ সেনঃ আ।’

Santali kahani ধূড়ি সিঁদুর part-2

সাগেন দুওয়ৗর খন অড়াঃগে বাং এ দিশৗ দাড়েয়াঃ কানা। বাং এ ঠিকৗ দাড়েয়াঃ কানা, চেদাঃ তেহেঞ গাতেঃ ক মানায়ে কানা ? বাহাগে আতরা ওডোক কাতে সাগেন মেনতেয় হহ লেদা। খেলা লেঁগা সুপুরে সাব কাতে অড়াঃ সেদ এ অর খৗড় কেদেয়া। আদয় সায়গাদ আদেয়া তেহেঞ খন সাগেন দ হিড়িঞ হুয় আমা। গাপা মামা অড়াঃ ইঞ ইদি কামা, অঁডেগে পাড়হাঃ মে।

সাগেন ছাড়া বাহা চিকৗয় তাঁহে কেয়া? অনকাতে বাহা মৗইদয় মেন গদ কেদা- মামা অড়াঃদ বৗঞ সেনঃ আ । খেলা দ লুতুররেয় পেটের কেদেয়া- বাম চালাঃ আ?’ বাহা মৗই বায় সাম্বড়াও দাড়েয়াদা, মেদ্ খন মেৎদাঃ হিডির হিডির সারেড় তুৎ এনা।

রৗগি তাপতে খেলা দ অৗডি আট এ এগের কেদা। বাহা দ রাঃ রাঃতে আজ

আয়ো ঠেন সেন কাতে আঞ্চাররে গুঁণ্ডত হাঁপি কাতে কুঁসুদ কুসুদ এ রা- রাঃ কানা। নাসে নাঃ মেৎদাঃ গে কুড়ি হপনাঃ অন্তর জিওয়ীরে সেঁগেল সালগাও কেন লেকায় কৗমিয়া। হাড়াম বুড়ি যাঁহা তিনৗঃগে পটাও ক তাঁহেন মিদ বেড়া রেহঁ দুলৗড় সৗগৗই উমুলরে সিতুং বাজাঃ গেয়া ।

অনকাগে বাহা খৗতির হাড়াম-বুড়ি অৗডি আঁট কিন রপড় বাড়ায়েনা—

—আম গিদরৗ জানাম জংমে আর দাল কম !

—আলম মচাঃ আ! নুই অবলা গিদরৗ জানাম কাতেগে কাল মা হুয় আকান।

— মা এনখান লিঁবদ্ গজ গিডি কায়মে ? এনখান সানাম জ্বালা খন ছুডৗর এম 

ঞামা। 

হাড়াম বুড়িয়াঃ মচা খন অৗডিগান রৗগি কাথা সার তেপেরাং—এন লেকাকিন মেন পুচুজ কেদতে, খেলা দ অৗডি দুঃখ এ বুঝৗও কেদা। জানাম গিদরৗ খৗতির দিনৗম গে নেয়াও রপড়। গিদরৗ বাং অকয়িজ, আর কিন অকা গিডি কায়া! মচা রেনাং কাথা উলি দাঃ সাঁও উদ্ মিদ্‌ কাতে খেলা দ থির রেগেয় তাঁহেয়েনা।

অনলিয়ৗ:- ছাকুলাল মুরমু