Santali Kahani ধূড়ি সিঁদুর part-3

দিন সময় লাহা ইদিঃ সাঁও সাঁওতে সাগেন আর বাহা মৗইয়াঃ গাতে মায়া হুঁ মেটাও ইদিয়েনা। চেকাতে বাহা দ মামা-মামী তেকওয়াঃ দুলৗড় উমুল রে মঁজগেয় হারা বুরুঃ কানতে, সুর সৗগিঞ হড়াঃ মে‍ৎ মা নাওয়া বুসৗড়-বাহা রেগে তৗকিজ লেন তাঁহেদ। উনদ বাহা, অৗতু রেনাং মিডিল ইস্কুল রেয় পাড়হাও কান তাঁহে। অলঃ পাড়হাও রেহ অৗডিগে লাসের এ তাঁহে কানা। অঁড়ে খনাঃ এ পাস কেদ্ খান অৗতু সোর হাই ইস্কুল রেক ভুৰ্ত্তি কাদেয়া। মামা তেকহঁ কিসাড় হড় ক তাঁহে কানা। উইহৗর তাঁহে কানা মিদ দিন হিলঃ

মামা তেকওয়াঃ তুম মারশালায়। মেনখান হড়মরেনাঃ দৗগী দ পালেন অহগে মেটাও কঃ আ? নিতঃ হাবিজ বাহা মৗই বাং এ বাড়ায় তাঁহেজ আ, জে আজাঃ দ বাপ্লা হয় আকানা মেনতে। উইহৗর দ তাঁহে কানা অলঃ পাড়হাও রে। মিদ দিন হিলঃ চাকরি ঞাম কাতে আয়ো বাবা তিকিন নাপায় রেয় দহ কিনা মেনতে।

Santali Kahani

অকয়াঃ মলংরে চেদ অল আকানা, অনাদ অকয় হঁ বাংব বাড়ায় ঞাম দাড়েয়াঃ আ। খেলারেন গিরৗ-পিদরৗ আর বাংক ঞলে লেনা। আঁশ তাঁহে কানা বাহা বিটিয়াঃ জিয়ন উমুলরেগে আসরাঃ রেনাং। নওয়া আসরা অকা সেদাঃ হয় বৗরভু তেয় অটাং রৗপুদা অনা রেনাং বতর হঁ হড়ম মায়ামরে ভগি লেকা ভেদাও লেন তাঁহেদ।

বাহা আঃ উমের ই গেল মড়ে বছর এ লেবেল সেটের বেদা। অল আসড়ারে গাতে ক আডি গেক জটাও এনা। মেনখান আঁড়ি উতীর দ বাং এ জটাঃ তাঁহেদ্। আর মিদ্ সেরমা তায়ম খানগে মেট্রিক বিনিড। অনাতে অল পাড়হাও আড়ি রিহিটে ছুটাও লেন তাঁহেন।

বাহা মৗই আঃ নাপায় আচার বেওহার।অৗডি মজ রড় লাঁদা। নাঁসেই মনেরে হিঁসৗ সুয়ৗগে বাং। অনাতে জটাও জটাও সনতাঃ রিদৗই গাড়রে বাহা মৗই আঃ রুপ মহর তিস খনাঃ চ ছাপ সাঁরি আকানা। মিদ কেলাসরে কিন অলঃ তাঁহেদ। অৗকিনগে তায়ম মাড়াং। বাহা দ বাং এ বাড়ায় তাঁহেদ। সনত মেমেন সানায়া মেনখান একলারে জাঁহা কাথায় উইহৗর দহকাঃ আ, বাহা সামারে আলাং গে বাং উল্টাঃ তাঁহেদ। চিকৗতে সৗরি দুলৗড় কাথায় বাড়ায় হচ এয়া? সনত অৗডি চিন্তৗরেয় ঞুর এনা।

Santali Kahani

সনত আপাত দ বাহা আজ মামা আতু রিনিজ ঞুতুমান হড় কানায়। চেদাঃসে, ধন দাড়েগে সাঁওতা তালারে মৗন মহৎ দয় সেঁড়া দাড়েয়াঃ আ। আর সনত গে একলা কড়া গিদরৗ তায়, অনাতেগে অৗডি বৗড়তি দুলৗড় এ এমাদে তাঁহেদ। নতে বাহারেন নাওয়া পেড়াহঁ দিনৗম ধারা কে হিজুঃ তাঁহেদ। পেড়া হপনাঃ মেদ আঁশ মেটাঃ রেহঁ মনেরে অৗডি মারাং হিদিজ- দ তাঁহেন গেয়া । অনাতে অকয় পেড়া হঁ বাংক গৗতয়ৗও সৗরি লেনা। মামা তেকওয়াঃ উইহৗর নাপায় ঘারঞ্জরেগে  ঠাঁও কায় রেনাং। চিকাতে কুড়ি হপন দ জাঁওয়ায় অড়াঃ রেগে ক সভাঃ আ।

নতে, সনত বৗবু সারা লেতাড়-এ উইহৗর তাঁহেদ, পাছে নওয়া নাওয়া ফুটৗও বাহা এটাঃ হড়ক টেঁগজ ইদিয়া । ঞিদৗ জৗপিদ কুকমু তেহঁ, বাহা মৗইয়াঃ রুপ মহরগে মেৎ

সামাংরে ঝালকাঃ তাঁহেদ। সিপিবিল দুলৗড় রপড়। বাহা বাগানরে খিলডু এনেজ। বাহা মৗইয়াঃ মেসকজ মাছা লাঁদাতে সনত দয় বুল তোয়েল কঃ তাঁহেদ। কুকমু কাথা অৗডি মজ অৗইকৗঃ আ। মেনখান এভেন তরা সানাম সিবিল কুকমু কাথা পেঁড়াঃ চাবাঃ আ।

মিদ্‌ দিন আসড়া সেনঃ অক্তে, সনত দ আঁড়গাতরে ওডোক কাতে হর সেদরে বাহা মৗইয়াঃ তৗঁগি তাঁড়ারের তাঁহে কানা। উইহৗর তাঁহে কানা সানাম তেতাং আঁশ বাহা কেয় লৗই সদর আয়া। কয়ঃ কয়ঃ তে হটঃ কহঁ লাঁগা চাবায়েনা। আর যাঁহানাঃ তৗঁগি তাঁড়ায়রে তাহেন খান অক্তহঁ বাং খেমাও ইদিঃ আ। ইনৗ তায়ম খানগে মিদ বার পৗঠুওয়ৗ গিদরৗ কহঁ আসড়া সেদ গেক রেলাও সেনঃ কানা। অনাতে, আঁশ রেনাং তারাস তাঁহুগে সনতাঃ মনেরে তৗকিজ রাকাব কানা।

Santali Kahani

বাহা, অনা তায়ম খানগে অড়াঃ খনে ওডোক এনা। একলাগে বৗসয়ৗম বেড়া হর-হরতে আসড়া মঁহড়ায় লাহায়েনা। সনত এনাং খন তৗঁগি তাঁড়াঃরেয় তাঁহে কানা। বাহা মৗই হর তে হিজুঃ এ ঞেল কেদে খান, আজ হঁ নাঁসেনাঃ এ লাড়াও ঞঃ এনা। বৗয় বৗয়তেয় তাড়াম আকাদা। ইনৗ খানগে বাহা হয় সেটের কেদেয়া। সনত ইনৗঃ এ ভরসায়া ইনৗঃ বাং আ। দিজ আকান লেকায় আইকৗও এদা। অকা লেকাতেচয় মেন গদ কেদা— “বাহা অৗডিম পলম এনদ।’ বাহা দয় মেন কেদা বাং আ তো! সময় মা অৗওরি হুয়ুঃ আ? আর যাঁও হঁত নিয়ৗ বেড়া গিঞ হিজুঃ আ ।

হরতে তাড়াম তাড়াম তুলুজ গেকিন কুপলি রপড় কানা।

‘আচ্ছা বাহা আম’. …………… মেনকাতে নাঁসেনাঃ এ থির ঞঃ এনা তায়ম

মাড়াং কিন তাড়াম আকাদ তাঁহেদ।

বাহা হাহাড়াগেয় বুঝৗও কেদা, মেন কেদায় ইঞ’ !

ইনৗ খানগে সনত দয় রড় রুওয়ৗড় কেদা, হোয় আমগে চেদ লেকাম পাড়হাঃ কানা? নিয়ৗ বারদ নাপায় তেগে বিনিড দ পারমঃ আ?” ‘তিনৗ নাপায়! আলে কুড়ি গিদরৗ আঃ বহঃরে তিনৗঃ হাতাং তাঁহেন তে’—

বাহা দয় মেন রুওয়ৗড় কেদা।

চেদাঃ বাং আ? বাহা আম সাঁও অৗডি মারাং লৗকতি তাঁহে কানা। ইস্কুল হঁ সেটের হিজুঃ কানা সনত অৗডি উসৗরা মেমেন সানায় কানা ইনৗ তায়ম সনত যাঁহানাঃ বাং এ মেন দাড়েয়াদা। থির কাতে বাহা সেদ গেয় কয়ঃ আকাদ তাঁহেদ।

বাহা দয় ঠিকৗ ঞামকেদা, সনত লাজাও বতর পালেন এ বুঝৗও এ তাঁহেদ। বাহাগেয় কুলি গদ কেদেয়া ‘ চেদ লৗকতি সনত ?’ —ইয়ৗ মানে…….

।’ সনতাঃ হড়ম সানাম থার থারাও এনা মিদ মচা

বাং এ রড় রুওয়ৗড় দাড়েয়াদা।

বাহা সনত কে আরহঁয় কুলি কেদেয়া — মেনমে সনত, সনত অৗডি ঘৗড়িক থির রেগেয় তাঁহেয়েনা। ইস্কুল হঁ সেটেরেনা। সনতাঃ উইহৗর কাথা উইহৗর রেগে তাঁহেয়েনা।

বানা হড়গে ইস্কুল কিন বলয়েনা। কেলাস রুম ভিতৗর রেহঁ, সনত দ হৗপি হৗপি বাহাগে সারা লেতাড় এ কয়ঃ এয়া। মাচেদ্ এ বলয়েনা। হর রেনাং কাথা ক উইহৗরতে সনত দয় কৗরিঘাম উতৗর এনা। নিজেরাঃ হাজরি সানাম এ পারম হচ কেদা। মাচেদ্ দ আজসেদ্ কয়ঃ কাতে দহড়ায় হহ লেদা। সনত দয় চমকাও গদ্ এনা। সানাম পৗঠুওয়ৗ কড়া-কুড়ি গিদরৗ দক লাঁদা আদেয়া। লাজাওতে তিঁগুরেগেয় তাঁহেয়েনা। তায়ম মাচেদাঃ কাথাতে দুডুব হৗপিয়েনা। এনহিলোঃ অকয় মাচেদাঃ পাড়হাও হঁ নাপায়তে বাং এ আজম ঠৗওকৗ দাড়েয়াদা। মিদ লুতুর সেনতে বল লেন কাথা আর মিদ লুতুর সেনতে ওডোক পারম এনা।

ইস্কুল ছুটি কাতে, বাহা দ আরহঁ জটাও ক সাঁও এ রুওয়ৗড় কান তাঁহেদ। অনাতে সনত দহড়া বাহা কে চেদ্ কাথা হঁ বাং এ মেন দাড়েয়াদেয়া । আপান-অৗপিন গে জটাও ক সাঁও অড়াঃ তিকিন রুওয়ৗড় হেজ এনা।

ইনৗ ঞিদৗ সনতাঃ জৗপিদ্ চিকৗ হিজুঃ আ? ঞিদৗ গেলবার টাড়াং হাবিজ একলায়ে দুডুব হৗপি আকানা। তায়ম অৗডি কষ্টতে জৗপিৎ হেজ এনা। অৗডি বার-বার এ কুকমু লেদ্ গেয়া। অনা কুকমু সৗরি লৗগিদ্ ভরসা বাং কুড়ৗঃ কানা। উইয়ৗর কাথা দ পালেন কুকমু রেগে তাঁহে উতৗরঃ আ?

অনলিয়ৗ:- ছাকুলাল মুরমু