Santali Kahani ধূড়ি সিঁদুর part-4

বাহা লৗগিদ পেড়া হপন চেদাঃ বাংক গৗড়য়ৗ কানা ? নওয়া কাথাদ সানাম সুর সৗগিঞ অৗতু করে ক বাড়ায় ঞাম কেদা। উকু দানাং কাথা দ বুরু সেঁগেল লেকা অক্ত বাং এ তাঁগিয়া । বাহা মৗই হঁ নাসে নাসে তেয় বাড়ায় ঞাম কেদ গেয়া। বাড়ায় ঞাম কাতে আর বাং চেদ এ চিকৗয়া? পালেন আয়ো বাবা আর মামা তেকওয়াঃ অৗখির উইহৗর বাং এ পুরৗও দাড়েয়াঃ গেয়া। অড়াঃরে কুড়ি গিদরৗ ক তাঁহেন খান, জাঁওয়ায় লে এনাং আয়ো বাবা আঃ পাপ দ চাবাঃ আ নওয়া উইহৗর দ চেদ সৗরিয়াঃ কানা, হারা বুরু লেনখান কুড়ি গিদরৗ দ জাঁওয়ায় অড়াঃ রেগে ক শোভাঃ আ? চাকরি নুকরি আর খাটাও কাতে বায় অৗসুলঃ তে? কাথা দ, অড়াঃরে ডৗঁগওয়াতে কুড়ি গিদরৗ ক বুডিঃ খান আয়ো বাবা আর বয়হা কহঁ সাঁওতা তালারে লুতুর সারেড় টটসাঃ কাথা ক আঁজম আকওয়া।

Santali Kahani ধূড়ি সিঁদুর part-4

আর খেলা হঁ বাহা হাঃ মেদ আহা ঞেল কাতেগে জিয়ন খেমাও হয় আয় কানা। চাঁদো হঁ বায় দায়া লেনা। আর মিটাং গান সনা হঁ বায় আঁজলে আদেয়া। অনাতে চিন্তৗ তৗঁহুগে সারসাও লেনা। মিমিদ ধাও একলাগেয় গুনি ভাবিয়া — মিৎটাং কুড়ি গিদরৗ। নুই হঁ বাং এ ঠাঁও দাড়েয়ায় খান সুর-সৗগিঞ হড়মা তৗহুঁ বাড়তি গেক রড় মাগালা। খেলা দ পালেন কুড়ি গিদরৗ আঃ দাড়েগে জম সানায় কানা। অনাতে নিত হাবিজ হারা উমের কুড়ি গিদরৗ অড়াঃ রেগেয় দহ আকাদেয়া। নংকান কুড়ি গিদরৗ অকয় আতায়া? কুড়ি গিদরৗ দ সারজম সাকাম। মিদধৗও এ বৗড়রা লেনখান চেদ রেহঁ বাং এ লাগাঃ আ। এমান এমান ক রড় মাগাল গেয়া ।

পেড়া হপন চিকৗয় বুঝৗও হচ কওয়া। বাহা আঃ বাপলা দ আওরি হুয়ুঃ আ মেনতে? গটা পাড়া খন আনাট পেরেজ আকানা। খেলা বায় উইহৗর দাড়েয়াঃ কানা, অকয়াঃ হটঃরে টাটকা দয় আরাও গিডি কায়া ?

বাহা মৗই বাড়তি যাঁহানাঃ বাং চিন্তৗ কাতে অল পাড়হাওগে ব়িহিট এ ছুটৗও লেনা। অনাতে, নাপায় তেগে বিনিড দয় পারম লেদা। সনত বাহা উইহৗর তেগে কম অর্জ,তেয় পারম এনা। আতো টলারে ডাম ডাহে এনা, নায়কে হপন সনত বাহা সাঁও বায় দাড়ে লেনা। অনাতে সনত আজ বাবা অৗডি চিন্তারেয় পাড়াও এনা। বাং এ বাড়ায় তাঁহেদ বাহা মৗইয়াঃ রুপ মহরগে সনতাঃ লাসের হাতাং দ মুনগৗ গাঁড়ার লেকায় তগজ লাহুদ আকাদা মেনতে।

Santali Kahani ধূড়ি সিঁদুর part-4

এনরেহঁ বাহা আজ বাবা আনর মামাতেদ্ দ মনেরে রৗস্কৗ দ নাসে হঁ বাংকিন অৗইকৗও লেদ্‌ গেয়া। চেদাঃসে মারাং উইহৗর মা বাহা চিকৗতে অৗখির জিয়ন লাগি আসরায় ঞামা? আয়ো বাবা আঃ নংকান উইহৗরতে, আব সাঁওতা তালারে নাপায় নাপায় অল পাড়হাও কুড়ি গিদরৗ, জানাম অড়াঃ খন জাঁওয়ায় অড়াঃ তেমন ঠেলাও ইদি কাকওয়া। চিকৗম বাড়ায় কেয়া নংকান কুড়ি গিদরৗগে মিদ দিন হিলঃ সাঁওতা সুসৗর আর বাং অৗকিলান হড়ক হয় দাড়েয়াঃ আ?

আয়ো বাবা হাঃ জিয়ৗড় উমুল খন ছুডৗর কাতে, অৗটু পৗটু এটাঃ অড়াঃ কঠে হরহ। কম উমেররে বাহা সিঁন্দুর কটা কাতে আর থান বাঁন্দে কাতে ঘারঞ্জ রেনাং সানাম জালা নিপিল অচো, নাসে হঁ আয়ো বাবা হিদিজ বাংক বুঝৗওআ। পালেন নওয়াগে তিরলৗ হপনাঃ মারাং এনেম দ

তাঁগিরে তাঁহেন তাবন পে Part- 5

অনলিয়ৗ:- ছাকুলাল মুরমু