Santali Love Story Kahani ধূড়ি সিঁদুর Part-8//new santali love story kahani 2024

.

 সনত আই এসসি রেয় ভুর্ভিয়েনা। নাওয়া, নাওয়া, পৗঠুওয়ৗ কড়া-কুড়ি ক, সারাখন গে পাতা লেকা হিজুঃ সেনঃ লাগাও আকানা। মেনখান হড়ক তালারে তাঁহে কাতে হঁ মনে জিওয়ীরে রৗস্কৗ দ বাং তাঁহেয়া। হোস্টেল রেহঁ অৗডি গাতে। গাতে তালারেহঁ একলাগেয় অৗয়কৗও তাঁহেদ।

সারি গাতে মা আজখন সৗগিঞরে। অলঃ পাড়হাও রেহঁ মনে বাং লাগাঃ তাঁহেদ। গাতে অকারেয় ঞামেয়া? উনিমা অলঃ ক বৗগি হচ কেদেয়া।

                         

Santali Love Story Kahani ধূড়ি সিঁদুর Part-8//new santali love story kahani 2024

মিদদিন তারাসিঞ বেড়া সনত দয় দুডুব আকানা, আজাঃ কুটরিরে। অৗডি দিন গতয়েনা। এনরেহঁ চেদ খবর বাংতে চিন্তৗ মা হুয়ুঃ গেয়া। তিনৗ চেদ্ লেকা মেনায়া। উইহৗর এদায় পারম আকান দিন। ইনৗ অক্ত দুওয়ৗর সিলপিঞ অকয় চয় ঠঃ-ঠঃ কেদা। সনত বেরেদ কাতে সিলপিঞ ঝিজ কাতে ঞেল আয় দ, পিয়ন চিঠি সাব কাতেয় তিগু আকানা। চিঠিয় আতাং কেদা দহড়া সিলপিঞ দয় টেলাও ভিড়ৗও কাদা। অড়েজ কাতেয় ঞেল কেদা। বাহাগেয় ভেজা আকাদ তাঁহেন। অৗডি যতন তে পাসনাও কাতে পাড়হাও এ

এহব কেদা-    

                                     

Santali Love Story Kahani ধূড়ি সিঁদুর Part-8//new santali love story kahani 2024

              দুলৗড়িয়া

                           সনত,

আশঃ অৗঞ সানাম গাতে ক সাঁও নাপায়রেম তাঁহেনা। ইঞ হঁ আয়ো বাবা আঃ দুলৗড় কলেরে কনো রকম, চাঁদো দায়াতে নাপায়গে মিনৗঞা।

মনে লাগাও কাতে ছুটাও কঃ মে। মিদ দিন হিলঃ হড়ঃ রেনাঃ রিকৗ কাঃমে। হয়তো লাহাস্তি লৗগিদ অৗডি রকমাঃ আনাট তাঁহেন গেয়া। মেনখান আনাট ক লেবেদ পারম লৗগিদ কষ্টঃ হঁ হুয় আম গেয়া। অনাতে দুখ আলম বুঝৗও আ।

নওয়া চিঠি সাকাম পাড়হাও কাতে মনেরে নাসে হঁ অৗড়িশ আলম বুঝৗও আ। অড়াঃরে দুডুব দুডুব ঘানে ঘানে হানা নওয়া উইহৗর হিজুঃ আ। চেদাঃ? বৗঞ ঠিকৗ লা আঃ আলাং আঃ দুলৗড় সৗগাই তপাঃ লৗগিদ নুনৗঃ মারাং হয় বৗরভু সেটরঃ আ মেনতে। বৗঞ সামড়াও দাড়েয়াঃ কানা, আকুত অৗকানৗঞ, লাজাও বতর দেয়া কাতে আমঠেন চিঠি সাকাম

অল।

ইকৗঞ খজঃ আ, দোষ দ ইঞৗঃগে। তেহেঞ খন তপাঃ হয় আলাং আ দুপুলৗড় তপল মায়া। কৗজ তালাং খৗতির অৗখির জিয়ন বডে দাঃতে আলম উম আঁড়গোয় তামা। বাংখান রিলৗ মালা সনের বাখোল পাঁক রেনাং পয়রানী বাহাতে সাজাও আঁশ, ঝিপির দাঃতে বুনুম হাসা লেকা লে চাবাঃ আ। ধৗরতি আকানৗঞ মিদ টিউৗঃ ধুড়ি, হালা হয় অৗঞা নওয়া ঋণ। নওয়া ঋণ দ সনত আলাং

আ দুলৗড় সৗগৗই খন হাজার গুন মারাং আ। ইঞাঃ কাথা আজম গে হয় আমা, সনত। আর ইঞ সাঁও ঞাপাম আলম রিকৗয়া। তপাঃ সৗরিমে দে তপল মায়া, হিড়িঞ তিঞমে রেয়াড় রড় লাঁদা। মা এনখান বিদৗয় জহার।

                                                         ইঞগে

                                                       অভাগিয়া,

                                                                বাহা।

        

চিঠি সাকাম পাড়হাও মুচৗদ্‌ সাঁওতে কুটবুর হাঁপিয়েনায়। টাটকা চেকায় রাচাঃ তপাঃ দাড়েয়াঃ আ দুলৗড় মায়া! আজ বাংখান নওয়া সুতুঃ সুমুং জিওয়ৗ তিনৗঃ দিন দুখ এ সাহাও কেয়া।

উইহৗর-উইহৗরতে বেড়া হঁয় হৗসুর এনা। ইনৗ ঞিদৗ বেস তেদ বায় জৗপিদ দাড়েয়াদা। ঘানে ঘানেয় চমকাও বেরেদ কানা। গাতে সানাম ক অৗড়িস চাবায়েনা।

  

Santali Love Story Kahani ধূড়ি সিঁদুর Part-8//new santali love story kahani 2024

আঁগা মারসাল লেনা সে বাং, বেগ সাব কাতে ওডোক এনায় বাহা সাঁও ঞাপাম। অৗতু সেটেরতে বৗসৗয়াম গদ এনা। আতে খন নাসে সৗগিঞরে পুখরি তাঁহে কানা। অনা সুর পুরব নাখা রেগে ডুঁগরী দ। আতে হড় অনা পুখরি রেগে ক তুপুনা। যাও হঁয় সেন বাড়াঃ আ। ভাদুডিহ অৗতু সাঁও ইনকৗ উপরুম দ তাঁহে কান গেয়া।

অড়াঃতে সেনঃ মা ভরসাগে বাং কুড়ৗঃ কানা। ডুঁগরী আড়ে রেগেয় দুডুব জিরৗও এনা। মারাং বৗসয়ৗম গদ আকানা। সিতুং দিন অক্ত। অত কহঁ লল চাবাঃ কানা। উইহৗর বাড়ায়ে আয় পাছে তেহেঁঞ তুপুন ঘাটরে বাহা সাঁও ঞাপাম হুয়ুঃ আ।

সিসিরজৗওয়ীজ পালেন সনতাঃ নেহর দয় আঁজম ঞাম লেদ গেয়া। বাহা মৗই ইনৗ বেড়াগে পুখরি সেন-এ মঁহডায়েনা। সেটের এনায় নিশুন বেড়ারে। হান্তে নাতেয় কয়ঃ বাড়া কেদা, সুর সৗগিঞ চিলি হঁ বায় ঞেল ঞাম লেদ কওয়া। সনত দ দানাং খনগে

পুখরি সেদ গেয় কয়ঃ আকাদা। বাহা ঞেলতে আরহঁ সদর সেদ এ ওডোক এনা। বাহা দ পালাট লুগড়ি দহ কাতে তুপুন ঘাটতেয় আঁড়গন কানা, অকা লেকায় কয়ঃ

ঞাম কেদেয়া সনত ডুঁগরী আড়ে রেয় তিগু আকানা। সনত হঁ আজসেদ গেয় কয়ঃ থির আকাদা। মেদ-মেকিন কপয়ঃ ঞাপাম এনা। বাহা নাসে নাসে দয় উরুমে কানা, মনেরে উইহৗর হিজুঃ কানা, সনত নংকান অক্তরে চিকৗয় হিজুঃ আ? উনি সাঁও সৗগৗই তপাঃ আকানা। আরহঁ ঞাপাম? আতরা আঁড়গো কাতে ধিরী লেকায় তিঁগু থির এনা। সনত সুর হিজুঃ হঁ বায় দিল এদা। অৗডি ঘৗড়িক বানা হড় কিন তিঁগু থির আকানা। সৗরি গে সনত কান গেয়ায়।

বাহা দ জাগাঁ ক ইসকির বাড়া কাতে তুপুন ঘাট খন রাকাব যখান ঞেলে কানায় সনতে তিগু আকানা ঘাট সুররে। লহৎ লুগড়ি হড়মরে জালাদ চাবা আকানা। হড়ম চেতান মিদ বার ঠপ দাঃ গুডরৗও আঁড়গন কানতে সিঞ চাঁদো তারাস ঝালকাও রাকাব কানা। বৗয়বৗয়তে রাকাব হেজ এনা। সনত চেদ মেমেন হঁ বায় ভরসায়েদা। বাহা মিদ্ মচা বাং রড় কাতে রহড় লুগড়ী সাব রাকাব কাতে পে জাঁগায় লাহা লেনা। ইনৗখানগে সনতাঃ মচা খন আজম এনা- ‘বাহা’! মেৎ খন মেৎ দাঃ, বায় সামড়াও দাড়েয়াদা।

বাং এ আজম আকাদ লেকা বাহা দয় মহডায়েনা অড়াঃ সেন।

সনত মটা আড়াংতেয় দহড়া কেদা- ‘বাহা’। তায়ম সেন খন অর কেদা লেকা,’ টাটকায় তিও এনা। কয়ঃ রুওয়ৗড় হঁ বায় দিল এদা। সনতগে বৗয় বৗয়তে সেন সুর এনা। রাঃ মেৎ আহা আতে সনত দয় মেন কেদা-বাহা! দুলৗড় সৗগৗই তপাঃ মাড়াং নুয় অভাগিয়ৗ দ নঁডেগে লিঁবদ গজ হট কায়মে।

বাহা কয়ঃ রুওয়ৗড় লেঃ আ, সনতাঃ মেৎদাঃ ঝারনা দাঃ লেকা সেতে অডোকঃ কানা।

ঞেল কাতে কয়ঃ রেগেয় তাঁহেয়েনা। নওয়া মেৎ দাঃতে অহ অৗতু চাবা কঃ আ দুপুলৗড় মায়া, বরং ঝালকাও রাকাব এনা পারম আকান উকু দানাং দুপুলৗড় কাহনী।

বাহা মৗই আঃ মেৎআহা পেড়ে পেড়ে গৎ এনা। মেৎ পেরেজ আর জহা পেরেজ মেৎ দাঃ তে বহেল চাবায়েনা আয়ো বাবা আঃ মানা কাথা।

Santali Love Story Kahani ধূড়ি সিঁদুর Part-8//new santali love story kahani 2024

হিড়িঞ চাবা কেদায় আয়ো বাবা আঃ মানা কাথা। চেৎ হঁ দিশৗগে বাং হিজুঃ কানা, আচকাগে সনতাঃ হড়মরেয় জালাদ মিদ এনা। সনতাঃ হড়ম সানাম ঝানকাও রাকাব এনা। বায় সামড়াও দাড়েয়াদতে আজ হঁ অনা রেনাং তেলায় রুওয়ৗড় কেদা। লহদ চাবায়েনা সনতাঃ রহড় লুগড়ী। সৗরদি সিতুংল-ল অতরে তিঁগু কাতে ল-ল ই বাংকিন বুঝৗও দাড়েয়াঃ কানা। দিশৗ ক আদ উতৗরেনা। অকয়াঃ মচা খন হঁ রড় দ বায় আঁজম লানা।

বৗয় বৗয়তে হড়মরে জুলুঃ সেঁগেল অহরাও এনা। অৗকিন- অৗকিন তেগে কিন ছাপাডাও এনা। বাহা মৗইয়াঃ বানার তি সনতাঃ তারেন রে। লহদ লুগড়ি সানাম, হড়মরে রহড় চাবায়েনা।

রাঃ মেদ আহাতে বাহা দয় মেন কেদা-‘ইকৗ কৗঞমে সনত।’

-‘চেদ ইঞ ইকৗ মেয়া। সুতুঃ সুমুং জিওয়ী, পাতাল বৗড়ি বৗনুঃ ঢঁগা লেকা অকারে উনুম গিডি আ, বাম ঠিকৗ দাড়েয়াঃ কানা?’

-‘বাং আ! নওয়া দাগী হড়ম আপে অড়াঃরে বাং শোভাঃ আ সনত।’

-‘আমাঃ দাগী হড়ম জটেদ কাতে, ইঞৗঃ হঁত দৗগি চাবা আকানা!’

‘সনত অনকা আলম উইহৗরা।’

-সনত জিওয়ী গটা কাতেয় মেন গদ কেদা- ‘এনখান দেলাং তেহেঞগে

মারাং বুরু জাহের আয়ো সাখয়ৗত কাতে যায়যুগ লৗগিদ সৗগৗই লাং তল সৗরিয়া।’

চেৎ এম উইহৗরেদা? পালাটঃ মে।’

অৗডি উসৗরা লুগড়িয় বদল কেদা। বানা হড় কিন মহডায়েনা সনত তেক অৗতু সেনগে।

তেহেঞ আয়ো বাবা আঃ মায়া রাচাঃ তপাঃ কাতে, বাহা দ নাওয়া ঘারঞ্জ সাজাও এ ওডোক ফারাক এনা। বায় রড়গঃ আ তিনৗঃ দিন নওয়া নাওয়া বেনাও সনের সংসার সুলুক তাঁহে কঃ আ?

সেটের এনা কিন আতু বাহের জাহের গাড়। সনত দ বাহা আঃ তিরে সাব কাতে তিয়ৗঃ খৗড় কেদেয়ায় জাহের গাড়। বানা হড় বেড়া রাকাব সেদ সামাং কাতে মারাং বুরু আর জাহের আয়ো ঠেন কিন নেহর কেদা- ‘হে মারাং বুরু জাহের আয়ো, সানাম কঠেন লিঞ নেহরঃ কানা, অৗলিঞাঃ ঞাপাম সৗরি কঃ মা। থুম অৗলিঞপে, নাওয়া সুলুক ঘারঞ্জ ঢঁগা সাঁওতা দরয়ারে লেগেম লেগেম পায়রা পারমঃ মা….. – এমান এমান নেহর বাড়া কাতে সনত হঁ বঁগা থান রেনাং মিদ টিডৗঃ ধুড়ি হৗর কাতে বাহা মৗইয়াঃ তালা বহঃরেয় ঘাসাও আদেয়া। তায়ম গড বাড়া কাতে জাহের গাড় খন কিন ওডোক এনা।

বেড়া হয় তারাসিঞঃ কানা। বানা হড় বৗয় বৗয়তে আতো সেদ্ কিন লাহায়েনা। কুলহৗতে বলন বাংকিন ভরসা লাঃ আ। অনাতে বাড়গে দুওয়ৗর তেকিন বলয়েনা।

অনলিয়ৗ:-ছাকুলাল মুরমু