সান্তাড় হপন কঠেন ইসৗয় ধরম পাসনাও গে খ্রিস্টান মিশনারি কয়াঃ জস দ তাঁহে কানা। অনাতে সিঞত দিশম রে এমান ঠাঁও করে মিসন ক তেয়ার লেদা। 1838 সালরে উড়িশা পনত রেয়াঃ জলেশ্বর রে “আমেরিকান বেপটিস মিশন” ক বেরেদ লেদা। আর নয়া মিশন রেনগে গৗলিম Rev. J. Philips আর Ellinoyes দ সান্তাড় আতু করে দাঁড়া কাতে,হড় হপন ক সাও মেসা কাতে সান্তাড়ি পৗরসি তে রড় কিন সেঁড়া লেদা আর ইসৗয় ধরম পাসনাও লাগিদ তে ইতুন আসড়া হঁ কিন বেরেদ লেদা। নয়া ইতুন আসড়া রেদ সান্তাড়ি তে অলঃ পাড়হাও হোয়োঃ তাঁহেদ অনাতে ক মেনা জে নওয়া মিশন রেগে পৗয়লৗ সান্তাড়ি পৗরসিতে অলঃ পাড়হাও দ এতহব লেনা। Rev. J. Philips দ সান্তাড়ি হড় কঠেন সান্তাড় সেরেঞ, ভেন্তাকাথা ক কাহানি ক, তুমৗল কাতে 1845 সালরে মিটাং পুঁথি হয় উছৗন লেদা। মেন খান অনা পুঁথি, রেয়াঃ চেদ ঞুতুম তাঁহে কানা অনা রেয়াঃ হুদিস দ নিত ধারিজ হুঁ বাং ঞাম আকানা। নয়া গে চেতা সান্তাড়ি পৗরসি তে পৗয়লৗ উছৗন পতব কানা। নয়া পতব ক দ বাংলা চিকি তেগে অল লেনা। Rev. J. Philips 1852 সালরে মিৎটাং রনড় পতব হঁয় অল লেদা। অনা রেয়াঃ ঞুতুম দ তাঁহে কানা “An introduction to the Santali Language” নয়া পতব গে মেন গানঃ আ ‘হড় অবতার’ রেয়াঃ দ দলিল কানা।