Santali short story মেৎ দাঃ//Santali story   book pdf//All stories

মেৎ দাঃ

পুছিম নাখারেনাঃ হিরিচ পাসির রিমিল গে গুট য়ৗও মিৎ কাতেৎ মারাং অকচ দাঃ এ জাড়ি কেদা । লওয়া লেকান দাঃ ঞুর হৗয়েনা । ঠের ঠের রিমিল সাডে আর হুড়ুর বিজলী সাঁওতে ঝমর ঝমর দাঃ । কুলহি সাড়েরঃ দাঃ আতোয়েনা । বৗদ বৗইহৗড় গডা বিঠৗ পুডগে চেহেল চেপেল দাঃ তে ঞেলঃ কানা । এনহঁ দাঃদ বাং থিরঃ কানা । আলে অড়াঃ রে দাঃ দ ডিং ডাবুরঃ কানা । সেরমা খনাঃ ঞুরুঃ দাঃ দ বাই বৗইতে থির ইদি কেদা সাতে দাঃ হঁ জর জরতে কম ইদিঃ কানা । এনহঁ হুডুর বিজলী তাহুগে রেনাঃ আকাৎ আ । আতো টলারে সানান হড়গে কুহলি করেক উডুক আকানা । হানতে নাতে দাঃ রিমিলক কয়ঃ আচুরাঃ কানা পিড়িৎ বিজলী সাঁওতে আচকাগে পে পোন দাও সাডে য়েনা । বতর তে হড়াঃ ইং বরগে থার থারাও এনা । তালা কুলহি মাঝি থান সেন কাউ মাউ সাঁওতে রাঃ আজমঃ কানা । তাহলে চেৎ চিকৗয়েনা ? কুড়ি হপনাঃ কিকয়ৗ কিকয়ৗ রাঃ আঁজমঃ কানা । হান নাতে খনাঃ দৗড় ধাপক ঞির আকাদা মাঝি কওয়াঃ বাখোল সেন । ঘাড়িক তেগে ডাম ডাহে য়েনা বাং মা কাথাচ মাঝি কয়িচ তালা কড়া সেঁগেল দাঃ ঞুরহৗ আদেয়া । ঞুরহৗ সাঁওতেগে সানামাঃ ঘেট পটম সঁগে কাতেৎ বিজলী সাঁওতেগে সরগ পুরিতেয় মহডায়েনা । আচ মায় নাপায় এন মেন খান এরা তায় পান মুনিদ যায় যুগ লাগাৎ আতরা সেঁগেল রে খাদলে ওটো কাদেয়া ।

মেৎদাঃ

তিহিঞ খনাঃ বার সেরমা মাড়াং । হারু রেন এগাৎ আপাৎগে পানমুনি দকিন বানিজ আগুলেদেয়া । নওয়া আচিরর পাচির বেড়বা খোল তালারে । দালান অড়াঃ সানপিডৗ সানরাচা । পাচরি তালারে কুঞ । সাহান সাকানরেনাঃ অকা আঝাট এটকে টঁড়েগে  বানুঃ আ গড়া পেরেচ কাডা ডাংরা গুরিচ রেনাঃ তাম তাসে । অনাতে গুরিচ গ্যাসক বেনাও আকাদা । পানমুনি উডুকঃ আয় বলআয় মলং জদঃআ । আয়াঃ মলং নাপায়তে জানিচ নুনাঃ বেড়বাখোলদয় ঞাম আকাদা । আচকা বলঃদ  বাম সুমা জাঁগাগে গহড়ঃ তামা । মেনখান পানমুনি আয়াঃ মলংদয় জদ কচে উতৗরকাদা । অকয়হঁ বায় খজঃআ জুরিপৗরি জড়তিরয়ো আধা দিনরে বিজড়ঃমা । এনহঁ পানমুনিয়াঃ দুলৗড় সিকড়িদ জোরতেগে রাচাঃ তপাঃ এনা । চিকৗয়াম চাঁদওয়াঃ অল । পানমুনি জুরিপারিয়াঃ দুলৗড়দ নাপায় সাঁহিচ বায় ভুজৗও দাড়েয়াদা । সৗরদি যুয়ৗনরেয় রাঁডি য়েনা । রাঁডিয়েন রেহঁয় নাপায় এন গেয়া । চেদাঃ সে গিদৗর পিদৗরদ বানুঃ কওয়া । বাং খান কাদাম বাহা হড়ম গিদৗর যগাও যতন তেগে বাবের লেকা উঞকঃ কেয়া ।

হারুওয়া সানাম ভাঁডান কামিক হোয় পারমেন খান ।পান মুনিরেন এগাৎ আপাৎ পান মুনিদ আকিনাঃ অড়াঃ ইদি রেনাঃ কাথা কিন রড় কেদা । উনরে পানমুনিরেন হাঁন হার হঁঞ হার আঠের লেৎ গেয়া কিন মেন খান পানমুনিরেন  এঁগাৎ আপাৎ বাকিন বাতাও  লেদা । মিৎ ধাওরে যখন নওয়া অড়াঃ রে বায় জম ভূজৗও দাড়েয়াদা আদ দশার দ অনা অড়াঃ রেদ বাকিন এম রুওয়ৗড় এয়া । হান হার হঞা হার আঃ কাথা বাং জওয়াও লেনা ।

তিহিঞদ পান মুনি সিরম ঘুটু বাগি কাতেৎ আপাবারে অড়াঃ তে যায় যুগ লাগাৎ অডক চালাঃ হোয়োঃ কান তায়া । এনহঁ চালাঃ দ বাং সানায়ে কানা । আতোরেন সানাম কগে চালাও ওচোয়ায়দ বাং সানায়েৎ কওয়া । চিকৗয়াম তল বাবেরগে তপাঃ আকানা । কুলহি কুহলিতে তাড়াম আকাৎ পানমুনি দ অকয়হঁ ররড় বাং ক সুম এদা । কুহলি মুচৗৎ সেন কাতেৎ তিগু য়েনায় । তিগু কাতেৎ মিৎ ধাও তায়ম সেন এ কয়ঃ রুওয়ৗড় কেদা ।লেঁগাতিতে জদ ফারচা কাতেৎ তাড়াম এ এহব এনা । উমিন দিনদ আপাবারে অড়াঃ চালাঃ রে ইদি আকাদায় লাডু মিঠাই তাবেন খৗজাড়ি টুকুচ হাঁডি বতল পাউরা । উন দিনদ আপাবারে অড়াতেয় হেচ আকানা আরাঃ উপাল আলতা জাঁগারে ঝমর তড়া তিরে সেকেচ সেকেচ সনা চুড়ি জাঁগারে চুঁডুঃ যুতৗ বহঃ রে আরাঃ ফিতৗ বললে কান সুৎরে বহঃ বাহা । হরাসি পেরেচ ডাগ ডাগ সিঁদুর লেগাতিরে মেড় হেৎ সাকম পিড়িৎ পিড়িৎ । মেন খান তিহিঞদ চেৎ গে বানুঃ তায়া । বানুঃ তায়া সাঁদেশ ঠেকা পেরেচ বানুঃ তায়া সাঁদেশ গছা পেরেচ সঁগে আকাদায় একেন মুলিন মুঠৗন মেৎ হা সাড়ের মেৎ দাঃ।।