মঁড়ে সিঞ, মঁড়ে ঞিদৗ,দ অকা পরব ক মানাও আঃ মিমিদ দিন রেয়াঃ মিমিৎ টাং সেরেঞ !

মঁড়ে সিঞ, মঁড়ে ঞিদৗ দ সহরায় পরব ক মানাওয়া আর নওয়া পরব দ সান্তাড় হড় হপনাঃ ঝত খন মারাং পরব কানা। নওয়া পরব দ সহরায় চাঁদো রেয়াঃ আম্বাবৗসয়ৗ খন লেতাড় গে মঁড়ে মাহা ক মানাও আ। অনাতে নওয়া পরব দ হাতি লেকান সহরায় ক মেন আকাদা। নওয়া পরব রেয়াঃ মঁড়ে মাহা রেয়াঃ ঞুতুম দ (১) উম আদের মাহা (২) বঙ্গা মাহা (৩) খুন্টৗও মাহা (৪) সালে মাহা (৫) সামালে মাহা। মিদি মাহা রেয়াঃ জুদৗ জুদৗ মহত সে হামাল খেলাঃ আ। অনাক লাতার রে অল হোয় এনা। 

Santali sohrai parab

উম আদের মাহা- নওয়া মাহা হিলঃ দ নংকান সেরেঞ ক আজমঃ – গেয়া—

তেহেঞ দলে উম এনা

দল বাদল পুখরীরে,

গাপা দলে বঙ্গায়া

দারা হারা চাতম বাখোলরে।।

নওয়া সেরেঞ তালাতে বাড়ায়ম ঞামঃ কানা যে তেহেঞ দ উম আদের মাহা কানা মেস্তে। নওয়া মাহারেদ আতো রেন সানাম হড় উম নাড়কাঃ আক। লুগড়ি লাপো ক ক তেকে ফারাচায়া, অড়াঃ দুয়ৗর রাচা কক গেচ গুরিজ। নংকা কাতে গে সহরায় পরব দক আতাং দারামেয়া। উমহিলঃ গে গট গেঁড়িরে গটক বঙ্গয়া। সিঙ্গৗড় বেড়া আতে কড়া কদ কাড়া ডাংরী ক জাগাও কওয়া আর কুড়ি কদ গৗয় বিতবিল ক ক চুমৗড়া কওয়া। নংকা কাতেগে উন হিলোঃ দ পারমাঃ আ ।

Santali sohrai parab

বঙ্গামাহা- নওয়া মাহা হিলঃ দ নংকান সেরেঞ আজমঃ গেয়া-

নাই পারম গাডা পারম

ইঞ দ দাদাম গং লিপিঞ 

বাহা সহরায় রেদ দাদাম

নেওতা আকা দিঞা।

নওয়া সেরেঞ তালাতে বাড়ায়ঃ কানা যে, সারি সহরায় পরব রেদ মিসরা, হপন এরা, জাঁওয়ায় গমকে তেক ক নেওতা কওয়া। নেওতা যাহা হিলঃ দ গড়া বঙ্গা ক বঙ্গা বুরুয়া। বঙ্গা বুরু সৗত লেনখান বক বয়হা, মিশরা, হপন এরা জাঁওয়ায় গমকে মানাম ক মিদ সাঁওতেক জম ঞুয়া আর সুক দুঃখ ক থুতিয়া। নংকা কাতেগে অনা বঙ্গা মাহা পারমঃ আ।

Santali sohrai parab

সুন্টীও মাহাঃ- নওয়া মাহা  হিলঅঃ দ নংকান সেরেঞ আজমঃ গেয়া-

কুলহি মুচৗদ রেদ দাদা 

চেলে দাদাম তলেয়া? 

কাডাম তলে রেদ দাদা

শাড়িঞ বাঁদেয়া, 

ডাংরাম তলে রেদ দাদা

শঙ্খাঞ হরগা।

নওয়া সেরেঞ তালাতে ঞামঃ কানা যে খুন্টৗও মাহারে মিশরা, হপন এরা, জাঁওয়ায় গমকে তেক দক সেটের আকানা। উনকুদ কুলহি রে কাড়া, ডাংরা আঃ খুন্টৗও ঞেল লৗগিদ তেক আগু আক কওয়া যে কাডাসে ডাংরায় তলেয়া মেন্তে। চেদাঃ সে আকয়াঃ সাজাও হঁত অনকা লাক্তি কানা। তারা সিঞ বেড়া সানাম হড় মিদ সাঁওতে কাড়া ডাংরা খুন্টৗও ঞেল তালাতে কুশি রৗস্কৗ ক এপেম চাপালা। বেড়া হাঁসুর সাঁও সাঁওতে খুন্টৗও মাহা দ মুচৗদঃ আ।

Santali sohrai parab

জালে মাহাঃ- নওয়া মাহা হিলঃ দ নংকান সেরেঞ হঁ আজমঃ আ- 

হলা দনা দৗয়না

গৗয় কাড়াক মাতাও লেন,

তেহেঞ দনা দৗয়না

কুড়ি কড়া ক মাতাও আকান দ।

নওয়া সেরেঞ তালাতে বাড়ায়ঃ কানা যে হলা দ খুন্টৗও পারম কানা।

উনহিলঃ গৗয় কাড়া কওয়া রৗস্কৗ রেনাঃ দিন। মেনখান তেহেঞ দ জালে মাহা, তেহেঞ দ কুড়ি কড়া কওয়াঃ রৗস্কৗ রেনাঃ দিন কানা। উন হিলোঃ দ আতো রেন কড়া-কুড়ি পেড়া পৗহড়ৗ ক এনেজ সেরেঞ জং আ। আতো রেনাঃ চেতান কুলহি খন লাতার কুলহি গটা ক তাল আ এনেজ সেরেঞ তালাতে।

জামলে মাহাঃ- নওয়া মাহা হিলঃ দ নংকান সেরেঞ ক আজমঃ আ ।

দেসেনা দৗয়না জড়ি জোতে 

দেসেনা দৗয়না সিলি বাবের, 

হাতি লেকান সহরায় দৗয়লাং 

তল দহয়ে।

নওয়া সেরেঞ তালা তেগে বুঝৗও ঞামঃ কানা যে সহরায় পরব দ মুচাৎ দঃ কানা। মঁড়ে সিঞ মঁড়ে ঞিদৗ কুশি রৗস্কৗ তালাতে এনেজ সেরেঞ রেনাঃ মুচৗৎ মাহা। মিৎ সাঁওতে গাতে তুলুজ নওয়া মঁড়ে মাহা দ তিন রেচ পারম চাবায়েনা বা বুঝৗও লেনা। অনাতে মনে হয়োঃ কানা যাতে নওয়া সহরায় পরব আরই কিছুদিন তাঁহে লেনখান ভাগে কঃ আ । নওয়া সহরায় পরব বিদৗয় এমঃ বাং সানা কানা। মেনখান বিদৗয় বাং এমায় রেহঁ নুয় পরব দ পারম ছালাঃ গোয়ায়। অনাতে নওয়া পরব রে আর বাড়তি রৗস্কৗ জং লৗগিৎ নুয় হাতি লেকান সহরায় পরব দ শাড়ি জোতে সিলি বারেতে তল দহয় লৗগিৎ কাথা হঁ সেরেঞরে ঞেল ঞামঃ কানা। নওয়া মাহা হিলোঃ তারা সিঞ বেড়া ব়ুশিকা রুশিকিয়ৗ ক জগ মাঝি অড়াঃরে জম ঞু আক। আদ জগ মাঝি সানাম কগে যে যার আড়াঃতে ইদি সেটের হট কাকয়ায়। নংকা কাতেগে মড়ে সিঞ মঁড়ে ঞিদৗ রেয়াঃ সারি সহরায় পরবদ মুচৗদ দঃ আ  ।

অনলিয়ৗ:-D.D.Murmu & S.Hansda