সান্তাড় সাঁওতা তালারে সারজম দারেরেয়া চেৎ মহত মেনাঃ-আ !

সারজম দারে

সান্তাড় সাঁওতারে মেনাঃ সেরোআ আরিচালি কদ ঝতগে জৗ-আয়তান সাঁও আর চাষ আবাদ সাঁও জপড়াও মেনাঃ আ ধারতীরেনাঃ হয় হিসিৎ হুডুর বিজলৗ জারগে জাপুদ সাঁওতা নানা হুনৗর বঁঙ্গা বুরু ধরম করম কহ সিরজৗও আকানা । অনাতে অনা ক খন সুলুক নিরৗয়তে তাঁহেন লাগিদ হুরুত কুন্টুত দারে নাড়ী এমান করে ঠাকুর চিনতে বঁঙ্গা বুরু এতহব লেনা । তবে অনা ক মুদরে খেরওয়াল সান্তাড় সাঁওতা সারজম দারেরেয়াঃ ঠাঁও আর মহত দ আডি মারাং আ । 

বিনতী বাখেড়রে মেনাঃ মারে হাপড়াম ক রেয়াঃ কাথা লেকাতে সারজম দারেরেয়াঃ মহত কাথা বাক আজম লেদতে ঝতম সেঁঙ্গেলদাঃ জাড়িতে ল-তরজ লেদ কওয়া উনগে মিৎ কড়া মিৎ কুড়ি অনা হারাতা বুরু খোঁগোররে উকু দহলেদ  কিনতে উনকিনগে তায়ম দারামরে অডোং কাতে পৗয়লোতেদ সারজম দারে কিন ঞাম ‌লেদা যাহারেদ জাহরে থান কিন বেনাও লেদা অনা মাড়াং তেনাঃ কাথা-পিলচু বুডহি পৗয়লো হামাল হড়ময় তাঁহে কান উন অক্ত এটাঃ জিয়ৗলী এদরৗ মেৎতেক ঞেলএৎ কিন তাঁহে । উনরে পিলচু তিকিন জিউয়ি দহ ঠাঁও ঞাম লাগিৎ ঠাকুর ঠেনকিন আরজ লেনা । উনরে ঠাকুর মেতাৎ কিন তাঁহে হিহিড় খন সার টেরাং রেনাঃ কাথা ।

সারজম সাকাম

 মেতা কিন তাঁহে -অনা সার যাহা রে বিদঃ -আ অঁডে গে জিওয়ৗ দহ ঠাঁও বিন ঞাম । ঠাকুরাঃ কাথা লেকাতে পিলচু হাড়াম হিহিড় খন উগলি সার এটেরাং লেদা ঞেল কেদা কিন অনা টেরাং সার মিৎটাং সারজম বুটৗরে বিদ লেনা । অঁডেগে ঠাকুর মারাং বুরু জাহের আয়ো মড়ে ক-তুরুই ক দেবা সেবা লাগিদ জাহের গাড় বেনাও কাতে কিন গিরৗবাসী লেনা । নিয়ৗ বেগর হাপড়াম কওয়াঃ কাথারে আর হঁ মেনাঃ – আ খেরওয়াল ক যখন ধরম ক পিছৗ লেদা উন রে মিদটাং দারে বুটৗরে দুডুপ কাতে ধরম গাল মারাও ক দহ লেদা । অনকাতে আতনাঃ দারে দয় এড়ে কেদ কওয়া তেরেল দারে দ লেফেজ কেদ কওয়াঃ মাতকম দারে দ খদে লেদ কওয়াঃ মেনখানম মুচৗৎরে সারজম দারে গে ধরম গাল মারাও এ সারি লেদ তাকওয়া । নিয়ৗক নিনৗঃ ঘটন খাতির সারজম দারে আডি এটাঃ গে মৗনএ ঞামকেদা । ইনৗতে ঞেলগঃআ বঁঙ্গারে বুরুরে জানামরে ছৗটয়ৗররে বাপলারে ভাডানরে সানাম লেকানাঃ কামিকগে সারজম বুটৗরে সিগিলঃ কানা নেতারহঁ । অনাতে সারজম দারেরেয়াঃ মহত দ সানতাড় সাঁওতারে আডি মারাং গেয়া ।